Дербент райондин Белиж поселокдин 3-нумрадин юкьван мектеб Украинада кьиле физвай махсус серенжемда телеф хьайи Россиядин Игит Муслим Муслимован тIварцIихъ янава. Талукь къарар 5-мартдиз РД-дин Гьукуматдин Председателдин заместитель Муслим Телякавован регьбервилик кваз кьиле фейи заседанидал кьабулна.

Къейд ийин хьи, чи кьегьал ватанэгьли, викIегь хва Муслим Муслимован экуь къамат эбеди авун патал са кьадар вахт идалай вилик лезги халкьдин жемиятдин са шумуд тешкилат­ди Дагъустандин Кьил Сергей­ Меликован тIварцIел Белиждин 3-нумрадин мектебдиз М. Муслимован тIвар гун патал кьилдин чар рекье тунай. Чарчел ФЛНКА-дин президент Васиф Гьасанова, Вирироссиядин жегьилрин милли союздин председатель Кантемир Хуртаева, Гьажи Давудан тIварцIихъ галай руьгьдинни марифатдин центрадин регьбер Самур Алиева, «Лезги газетдин» кьилин редактор Мегьамед Ибрагьимова ва Кьиблепатан Дагъустандин жегьилрин Союздин регьбер Равидин Абдурагьимова къу­лар чIугунвай.

РикIел хкин, М. Муслимован бинеяр СтIал Сулейманан райондин Сайтархуьряй я. Адан аял вахтар Белиж поселокда­ акъатна. Игитди Дербентда В. Эмирован тIварцIихъ галай кадет­рин корпусда кIелнай ва вичин уьмуьр уьлкведин Яракьлу къуватрихъ галаз алакъалу авунай­. Кьегьалдин тIвар несилрин ри­кIе­ра эбеди яз амукьда.

Чи мухбир