Муаллимвилин пеше гьуьрмет авай ва вири вахтара четин пешейрикай сад я. Гьар садавай и пешедин сирер ачухиз  жедач. Лагьана кIанда хьи, аялрихъ галаз кIвалахдай къайдаяр чизвай, абуруз тербия, чирвилер гун патал чпин вири къуватар желбзавай муаллимар чи районда тIимил авач. Къенин чи суьгьбет, гьа ихьтин муаллимрикай сад тир, КIирийрин школада-интернатда ингилис чIалан тарсар гузвай жегьил муаллим Айдаева Залина Абдулбариевнадикай я.

Ери-бине КIирийрин хуьряй тир Залина Айдаева 1987-йисан 21-декабр­диз Кабардино-Балкария Республикадин Тыр­ныауз шегьерда дидедиз хьана. Школа акьалтIарайдалай кьулухъ, 2004-йисуз, ам Кабардино-Балкариядин госуниверситетдин немс чIа­лан от­деле­нидиз гьахьна. 2009-йисуз­ университет акьалтIарай ада сиф­те камар яслида-бахчада кIва­ла­хунилай къачуна. Гуьгъуьнлай хейлин йисара Нальчик шегьер­да мектебда кIвалахна. Жегьил муаллимди чаз хуьр шегьердилай са куьналдини тафаватлу туширди къалурна, ам кьисметди хайи ерийрихъ ял хъувуна. Залина Айдаева баркаллу тарих авай, машгьур алимар, писателарни шаирар, игитар, чIехи дережайрин регь­берар акъатай КIирийрин хуьруьз хтана.

2018-йисалай Залина муал­лимди КIирийрин школада-интер­натда аялриз ингилис чIалай чирвилер гузва. Ам районда кьиле фейи «2026-йисан лап хъсан муаллим» конкурсдин  гъалибчи хьана. Шад жедай кар ам я хьи, ада иштирак авур республикадин паюнани­ 40 муниципалитетдай 56 муаллимдин арада  ам шабагьдин чкадиз лайихлу хьана.

Хуьре, кIвале гьар са касдин, иллаки­ дишегьлидин къайгъуяр гзаф ятIани, Залина муаллим вичин гьар са тарсуниз хъсандиз гьазур жезва, ученикриз мягькем чирвилер гуз, гьакъикъи ватанпересар яз тербияламишиз вири къуватар желбзава.

«Муаллимвилин пеше хкягъун аял чIа­валай зи рикIе авай къаст тир. Школа­да кIелдай вахтунилай башламишна, зи рикI ингилис чIалал пара алай. Зун шад я къе жув и пешедин иеси хьунал. Чна пакагьан йикъакай фикирзавай гележегдин пешекарар тербияламишзава. Гьелбетда, алай вахтунда чна аялрал чIугвазвай зегьметдилай чи гележег аслу я», — лагьана гуьруьшда чаз Залина Айдаевади.

Адаз коллективда, хуьре, кIвале вичи чирвилер ва тербия гузвай аялрин, абурун диде-бубайрин патай еке гьуьрмет ава. Залинади халкьдин патай гьуьр­мет вичин рикI алай пешедай зегьмет чIугуналди къазанмишзава.

Залина муаллим, гележегда квехъ  куь баркаллу ва зегьмет алай кIвалахда генани еке агалкьунар хьурай. Квез алукь­­навай гатфар  мубаракрай.

П. Магьарамова