«Дагъларин гьунарлувал» программади дяведин махсус серенжемда иштиракзавай ва, отставкадиз фена, набут хьана, ислягь уьмуьрдив эхгечI хъувунвай кьегьалриз гьукумдин органра кIвалахдай мумкинвал яратмишзава. И программадик экечIнавайбурун арада пограничный къуллугъдин подполковник, СВО-дин иштиракчи Гьамдуллаев Медетханни ава.
Бинеяр Кьурагь райондай тир Гьамдуллаев Медетханан хизан Дербент райондин Нуьгди хуьре яшамиш жезва. Ада хейлин йисара Белижда, Дербентда погранчастара къуллугъна. Са шумуд йисуз погрануправленидин пресс-къуллугъдин руководителдин везифаярни тамамарна. Украинадин миллетбазрихъ галаз дяведин махсус серенжем тухуз эгечIайла, къене рикI авай офицердивай кIвале архайиндиз ацукьиз хьанач, Россиядин оборонадин министерстводихъ галаз икьрар кутIунна, ам СВО-диз фена.
ЦIийи фашистрихъ галаз кьиле тухвай нубатдин женгина офицердал залан хер хьана. Госпиталра сагъар хъувурдалай гуьгъуьниз ам хизандин патав ахъай хъувуна. Республикада «Дагъларин гьунарлувал» программа кардик кутунвайдакай хабар хьайила, адани арза вугана. Программадин имтигьанрай лайихлувилелди экъечIна. Ватанперес викIегь офицердиз Дагъустандин Кьил Сергей Меликова гъилин сят пишкешна.
Махсус программадин бинедаллаз М. Гьамдуллаев РД-дин тIебиатдин ресурсрин ва экологиядин министерстводин, кьилди къачуртIа, кьетIендаказ тIебиатдин мулкар, гьайванрин алем ва цин биоресурсар хуьзвай дирекциядин кIвалахдихъ галаз таниш жезва. Идарадин къуллугъчийри Гьамдуллаеваз адан кьетIенвилерикай, чпи гьялзавай кар алай месэлайрикай суьгьбетна.
– Программа алай йикъахъ галаз лап кьазвайди я, – лагьана М. Гьамдуллаева. – Ада чун хьтинбуруз республика патал зегьмет чIугвадай, чи алакьунрикай менфятлувилелди хийир къачудай мумкинвал гузва.
«Лезги газет»
