И йикъара Иркутскда 18 йисал къведалди яшара авай жегьилрин арада Россиядин кIвенкIвечивал патал кьиле фейи акъажунра Дагъустандин хкянавай командади санлай 19 медаль къазанмишна, идалди Гь. Мутиеван регьбервилик квай команда 1-чкадиз лайихлу хьана. Чи миллетдин векилрикай спортдин и жуьредай вичик еке умудар кутунвай спортсменрикай сад тир Али Ярагьмедов ана буьруьнждин медалдиз лайихлу хьана.
Вичин ери-бине Кьурагь райондин КIирийрин хуьряй тир жегьилди и акъажунра 110 кг-дин заланвал авайбурун арада вад бягьсина инанмишвилелди гъалибвилер къазанмишна, амма ярумчух финалда ам 4:3 гьисабдалди кумукьна.
Махачкъалада Гь. Гьамидован тIварунихъ галай школада тренерар Тимур Ярагьмедован (адан буба) ва Жамал Алиеван гъилик устадвал хкажзавай ада гьам азаддаказ, гьамни грекринни римлуйрин жуьреда кьуршахар кьунай вичин устадвал къалурзавайди рикIел хкиз кIанзава. ИкI, февралдин эвелра Суздалда Россиядин кIвенкIвечивал патал грекринни римлуйрин жуьреда кьуршахар кьунай кьиле фейи акъажунра А. Ярагьмедова 2-чка кьуна.
Рагнеда Рамалданова
