И йикъара Каспийскда, Али Алиеван тIварунихъ галай спортдин комплексда, япариз зайифдаказ ван къвезвай спортсменрин арада дзюдодай кьиле фейи Россиядин чемпионатда ва кIвенкIвечивал патал акъажунра уьлкведин 30 региондай тир 200-далай виниз спортсменри чпин устадвал къалурна.
КIвенкIвечи чкаяр кьурбурун арада чи ватанэгьлиярни ава. ИкI, уьлкведин чемпионатрин са шумудра призёр, Каспийскдай тир Мугьаммад Алискеров (81 кг заланвал авайбурун арада) – буьруьнждин ва Арзуман Нежведилов (50 кг-дин заланвал авайбурун арада) къизилдин медалриз лайихлу хьана (А. Нежведилован ери-бине Мегьарамдхуьруьн райондай я, ада тренер Абдулла Букарован гъилик устадвал хкажзава).
Адет яз, уьлкведин дережадин акъажунра кIвенкIвечи чкаяр кьурбурукай Европадин ва дуьньядин кIвенкIвечивилера иштиракдай хкянавай командаяр гьазурзава. Чна умудзава, винидихъ тIварар кьунвай спортсменри кесерлу и майданрани чпин устадвал къалурда, абурун гъалибвилери чун инлай кьулухъни шадарда.
Рагнеда Рамалданова
