И мукьвара зи гъиле Нариман­ Иб­рагьимова кхьенвай «Уламрай яна, ­гъетерихъди» ктаб гьатна. А ктаб ВЛКСМ-дин Мегьарамдхуьруьн­ рай­ком­­дин 1-секретарвилелай эгечIна, КПСС-дин Дагъустандин обкомдин­ алишверишдин, яшайишдин рекьяй­ къуллугъдай отделдин  заведующий­ ва ДАССР-дин недай-хъвадай промыш­ленностдин­, со­циальный обес­пе­чени­дин министр хьайи Зара Агьмадовна Латифовадикай я. Ам вичин къанажагълу уьмуьр инсанар, жемият ва гьукумат патал зегьмет чIугур, лап чIехи дережайрив агакьай, гзаф къени крар авур, алай вахтундани республикадин уьмуьрда­ иштиракзавай общественный деятель я. 1980-1995-йисара ам 3 сеферда ДАССР-дин Верховный Советдин депутатвиле хкяна. Зара Агьмадовнади республикадин экономика, яша­йиш, образование, культура вилик тухуник, халкьдин майишат патал­ намуслу пеше­карар, партий­ный кадрияр гьа­зурунин кIва­лахдик еке пай кутуна.

За сагърай­ лугьузва На­ри­ман Иб­рагьимо­ваз: ада чешнелу, намуслу­ гъи­лиз-руьгьдиз михьи, къаст кьилиз акъу­диз алахъдай, жемятдиз куьмекар гайи, гьукуматдин кIвалахарни лайихлудаказ кьилиз акъудай викIегь дагъви дишегьлидин къамат авай ктаб арадал гъанва. Ана вичин ва Дагъус­тандин газетриз, журналриз, Россиядин прессадиз акъатнавай маса авторрин макъа­лаяр, материалар лезги ва урус чIа­ларал ганва.

Санал кIвалахайбуру, дустари, мукь­вабуру, гьукуматдин деятелри Зара Агьмадовна гьуьрметдин гьуьндуьр кукIушрив гьикI агакьнатIа суьгьбет­зава.

Ктабдин 39-чина икI кхьизва: «Гьич вахтунизни килиг тавуна, зун куьмекдин гьарайдин сес галукьай гьар са касдин варцел физ алахъза­ва. Виридан тIварар за кьадач. А. Шагьмарда­н­о­вади ва У. Мамедовади (Бут-Къаз­ма­яр ва Советский хуьрер) атана­, чпин йикъакай-мекьекай ихтилат авур­­ла, за абурал кьил чIугуна».

Заз Умужат Мамедовадиз гайи куьмекдикай тамамдаказ кхьиз кIанзава. Гъуьлуькай чара хьайи дишегьли вад аял галаз азиятдик квай. Зара Агьмадовнади хуьруьн советдин, совхоздин­ регьберар тагькимарна, Умужатаз кIвал эцигдай чил ва стройматериалар­ гуз туна, вични аялрин бахчада кIва­лахал эцигна. Алай вахтунда адан вад аялни­, кIелна куьтягьна, пешейрин иесияр хьанва, чпин хизанарни  кутунва. Абурун­ патай  гьамиша  З. Латифовадиз алхиш ава.

Зара Агьмадовнадин зегьметчи инсанрал рикI хьунин, абурун агалкьунриз къимет гунин къилихрикай чаз Къурбанис­маилов Мегьамеда суьгьбет­на: «За армиядай хтайдалай­ кьулухъ «Фрунзенский» колхозда, гуьгъуьн­лай сов­хозда­ кIва­лах­на. Зара Агьмадовнадин теклифдалди чна Сар­даров­ Имаму­динан бригадада гьажибугъдаяр гьа­силдай комсомолринни жегьилрин­ звено тешкилна, зун гьанин звеновод тир. Гьажибугъдайрин кьакьан бегьерар гьасилунай заз Махачкъалада хьайи производстводин кIвенкIвечийрин совещанида иштиракун кьисмет хьана, гьана завай  радиокомитетдин журналист Абдуселим Исмаилова интервью къачунай…»

1971-1975-йисара зун комсомолдин райкомдин­ бюродин членвиле­ хкяна­. З. Латифовадин теклиф­дал­ди за Ор­д­жо­никидзедин хуьруьн майи­шатдин­ институтдин механический фа­культет куьтягьна­, за сов­хоздин механизаторвилин кьилин къуллугърал­ кIва­лах­на. Зун ва зун хьтин цIудралди инсанар­ З. Латифовадиз алхишар авуниз буржлу я. Къуй адаз Аллагьди чандин сагъвал ва гьар патахъай хъсанвилер гурай

Халкьдин баркалла кьилеллай гьуьрметлу чи игит вах, чна ваз Виридуьньядин дишегьлийрин сувар рикIин сидкьидай мубаракзава. Ваз ва ви мукьва-кьи­лийриз чандин сагъвал, кьилел рагъ алай ислягь цав хьурай!

Сулейман  Пашаев