Президентдин теклифдалди, «Россия – мумкинвилерин уьлкве» платформадин сергьятра аваз, Вирироссиядин «Зи уьлкве – зи Россия» конкурс тухуз хейлин йисар я. Тешкилатчийри 23-сезондин конкурсда иштиракиз кIанзавай виридаз теклифзава.
Конкурсди бажарагъ, алакьунар мадни гегьеншариз, къуллугъдин жигьетдай хкаж жез кIанзавай гьар садаз дуьзгуьн мумкинвилер яратмишзава. Лап хъсан проектрин иесияр гьукуматдин патай вижевай премияр, Россиядин регионриз сиягьатдай путевкаяр гуналди, ЕГЭ-дин баллрал алава баллар эхцигуналди, чирвилерин программайра иштиракдай ихтияр гуналди къейдда.
ЦIинин йисуз регионри кьил кутазвай проектриз кьетIен фикир гузва. Россиядин халкьарин садвилин йисан гьуьрметдай «Зи уьлкведин халкьарин садвал» номинация тайинарнава. Ада халкьарин арада дуствал, меслятвал мягькемаруниз, культурадин жуьреба-жуьре хилер хуьниз талукьарнавай проектар сад авун истемишзава.
Алатай йисуз и конкурсда иштиракун патал 3445 дагъустанвиди арзаяр ганай. Абурукай пуд кас финалдиз акъатна.
ЦIинин йисан конкурс образованидиз, илимдиз, карчивилиз, туризмдиз, экологиядиз, здравоохраненидиз, жемиятдиз талукь 12 номинациядикай ибарат я. Конкурсда иштиракун патал арза 2026-йисан 31-майдалди рекье тун лазим я. Экспертри хкягъай лап хъсан 300 проект финалдиз акъатда. Финал 1-июндилай 15-июндалди кьиле фида.
«Лезги газет»
