2026-йисан сад лагьай паюна Дагъустандин мектебрин ва аялрин бахчайрин тахминан 150 регьбердин аттестация кьиле фида. Идакай РД-дин образованидин ва илимдин министр Ягья Бучаева Сергей Меликован иштираквал аваз кьиле фейи совещанидал хабар гана.
Вири муниципалитетрихъ галаз образованидин хиле кадрийриз талукь сад тир сиясат тухунин гьакъиндай икьрарар кутIуннава. 2022-йисалай инихъ са агъзурдалай гзаф ксар аттестация авунва, абурукай 150-дав агакьна пешекарри истемишунриз жаваб гана. И кардин кьилин себебрик хкянавай рекьяй образованидин ва тежрибадин кьитвал, образованидин идарайрин нетижалувал къалурзавай делилар ва выпускникрин агалкьунар агъузбур хьун акатзава.
Совещанидал министрди къейд авурвал, кадрийриз талукь яз терефкарвал авачир «алциф» сиясат Агъул, Акъуша, Бабаюрт, Гумбет, Казбек, Къумтуркъала, Лак, Леваши, Рутул, Унцукул, Хасавюрт, ЦIунти, Шамил районра ва Каспийск, Буйнакск, Кьиблепатан Сухокумск, Къизляр шегьерра кьиле тухузва.
Идара ийидай кадрияр хкягъун патал РД-дин образованидин ва илимдин министерстводи республикадин конкурс тухузва. Алай вахтуналди ихьтин пуд конкурс тешкилнава ва тахминан 200 педагог хкянава. Гъалибчийри цIийикIа вердишвилер къачунва; вад кас идара ийидай къуллугърал ала – кьуд касди образованидин идарайриз регьбервал гузва, сад Гуниб райондин образованидин управленидин начальниквиле тайинарнава.
Саида Мурадова
