Россиядин мулкунал педагогикадин вузрик экечIунин къайдаяр виле акьадайвал дегиш жезва. Алай йисан 1-сентябрдилай РФ-дин просвещенидин министерстводин къарар къуватда гьатда: гила педагогикадин хиляй вуздик экечIзавай абитуриентри имтигьан обществознанидай ваъ, пешедиз талукь предметдай вахкуда. Амма, хабар гузвайвал, дегишвилер 2027/2028-йисан кьабулдай кампаниядилай къуватда гьатда. Гьаниз килигна, цIийи къайда алукьдалди гьазур жедай вахт гьелелиг амазма.
ЦIийиз кардик кутунвай къайда са жерге хилериз талукь жеда: математикадиз, физикадиз, астрономиядиз, информатикадиз, химиядиз, биологиядиз, урус чIалаз ва литературадиз. Гила, обществознанидай тир умуми суалрин чкадал гележегдин, месела, биологиядин муаллимри и предметдай дерин чирвилер авайди раижна кIанда, гележегдин филологри – урус чIалай ва литературадай, физикадин муаллимри – дуьм-дуьз илимрай хъсан чирвилер.
РФ-дин просвещенидин министр Сергей Кравцов инанмиш тирвал, ихьтин дегишвилери образованидин къурулушдиз хъсан патахъай таъсирда. Гележегдин муаллимривай гьеле кIелзамай вахтунда чпин пешедин важиблувал гьиссиз ва абурун вердишвилер гележегдин кIвалахда бакара къведайдахъ инанмишвал ийиз жеда.
Саида Мурадова
