СВО-дин иштиракчи, Дагъустандай тир подполковник Саид Ибрагьимовакай Россиядин Игит хьанва. Идакай вичин телеграм-каналда РД-дин Кьил Сергей Меликова хабар гана.
«Дяведин махсус серенжемдив эгечIай йикъалай чи 19 ватанэгьлидиз Россиядин Игит лагьай тIвар ганва. Саид Ибрагьимов Дахадаев райондай я. Дальний Востокдин командирар гьазурдай кьилин училище акьалтIарай ада къе мотострелковый полкунин батальондиз регьбервал гузва.
Женгерин майданда Саида вич халисан офицер хьиз къалурзава. Лап четин гьаларани ада вичел ихтибар ийиз жедайди успатзава. Дирибаш, мягькем, ихтибарлу командирди вичин аскерар виликди гьужумдиз тухузва ва гъалибвал мукьвал ийизва.
Саид, за ваз Игитвилин тIвар мад сеферда мубаракзава, ви крарал агъзурралди дагъустанвийри дамахзава», — кхьена Дагъустандин Кьили.
«Лезги газет»
