Пуд шегьердин аялри хайи чIалай авай чирвилер къалурна

Малум тирвал, чIаларинни меденият­рин жуьреба-жуьревал хуьн патал 1999-йисуз ЮНЕСКО-дин Генеральный конференцияди 21-февраль Вири халкьарин хайи чIаларин югъ яз тестикьарна.

Дагъустандин милли чIаларин де­ре­­жа­ярни алай вахтунда зайифбур яз гьисабзава. Ихьтин вахтунда чна, «Лезги газетдин» редакцияди, гьалар авайдалайни­ бетер тахьун патал милли медениятни чIал хуьнин рекье са жерге серенжемар кьабулзава, хейлин проектар агалкьунрал­ди кьилиз акъудзава, газетдин чинрани и важиблу месэладиз датIана фикир гузва.

Хайи чIаларин йикъан сергьятра аваз, алатай гьатфедин киш ва гьяд йи­къара «Лезги газетдин» редакцияди мергьяматлувилин «Иман» фондунин (регьбер – Фируза Керимова) куьмекдалди кьве олимпиада кьиле тухвана: 21-февралдиз – Каспийскда, 22-февралдиз – Дербентда.

Каспийскда

Алатай йисара хьиз, цIини Каспийск­да кардик квай, И. Ханба­лаеван тIвар­цIихъ галай РЦО-да Кас­пийск­динни Ма­хачкъаладин мектеб­ра 6-классра кIел­завай аялри лезги чIалай чпихъ авай чирвилер къалурна. И кьве шегьердин арада олимпиадаяр «Лезги­ га­зетдин» редакцияди цIи 9-сеферда яз тешкилна. Санлай къачурла, 20 аялди иштиракна (Каспийскдин мектебрай 15 аял атана, Махачкъаладин мектебрай – 5 аял).

Тапшуругъар кьуд жуьредиз пайнавайбур тир: 1) гьар жуьре хилериз талукь тестер; 2) къурулушдин жигьетдай гафар разбор авун; 3) синтаксисдин жигьетдай жумлаяр разбор авун; 4) орфографиядизни пунктуациядиз талукь махсус диктант.

Олимпиада «Лезги газетдин» кьилин редактор М.Ибрагьимова ва и цIарарин авторди кьиле тухвана. Виликамаз тайи­нарайвал, олимпиададин нетижада виридалайни хъсан чирвилер къачур вад аялдиз ва абурун муаллимриз кьилин пишкешар гана.

ИкI, 1-чка Махачкъаладин 59-нумрадин мектебда кIелзавай Шалбузова Фатимади кьуна (муаллим – Аксана Чубанова), 2-чка – Махачкъаладин 38-нумрадин гимназияда кIелзавай Алимирзоева Салимади (муаллим Алимат Баламирзоева), 3-чка – Махачкъала шегьердин 48-нумрадин мектебда кIелзавай Садихова Аринади (муаллим – Шукуфат Хибиева), 4-чка Каспийск шегьердин 13-нумрадин лицейда кIелзавай Мирзеагъаева Миланади (муаллим – Гуьзелхан Чубанова), 5-чка – Каспийск шегьердин 16-нумрадин гимназияда кIелзавай Челебова Марьяма (муаллим – Тамила Талибова).

Сифтегьан вад чка кьурбуруз талукь дипломар ва 15, 13, 12, 10, 9 агъзур манатдин кьадарра аваз пулунин пишкешар, лезги чIал дериндай чирдай махсус ктабар гана. Дипломриз ва 5 агъзур манатдин кьадарда аваз пулунин пишкешриз кIвенкIвечи вад чка кьур ученикрин муаллимарни лайихлу хьана.

ЦIинин кьетIенвал ам хьана хьи, кIвенкIвечи чкаяр кьун патал баллар бес тахьай муькуь аяларни гъилер ичIи яз хъфенач: вирибуруз олимпиадада иштиракна лагьай сертификатар, гьардаз 5 агъзур манатдин кьадарда аваз пул ва ктабар пишкешна.

Дербентда

СтIал Сулейманан тIварцIихъ галай 21-нумрадин мектебда­ни олимпиада кьиле фейи югъ шадвилин сувариндаз элкъвена. Шегьердин мек­теб­ра 6-классра кIелзавай 23 аялди­ иштиракна. Каспийскда кьиле фейи олимпиадада хьиз, инани аялриз кьуд жуьредин тапшуругъар ганвай. (Къейд ийин, садра кьиле тухвай олимпиададин тапшуругъар чна мад сеферда тикрарна сад­рани хгузвач, гьар сеферда цIийи-цIийи тапшуругъар гьазурзава).

Къадим шегьерда цIи 2-сеферда яз тухвай олимпиададин нетижаяр ихьтинбур хьана: 1-чка 18-нумрадин мектебда­ кIелзавай Гьасанова Наиради кьуна (муаллим – Таиса Магьмудова), 2-чка – 18-нумрадин мектебда кIелзавай Ибрагьимов Ибрагьима (муаллим – Женета Амаханова), 3-чка – 12-нумрадин мектебда кIелзавай Абасова Фатимади (муаллим – Людмила Эмирбегова), 4-чка – 8-нумрадин мектебда кIелзавай Тарашова Камилади (муаллим – Сабина Эседова), 5-чка – 2-нумрадин гимназияда кIелзавай Аллагьвердиева Марияди (муаллим – Альбина Магьмудова). И ученикриз 15, 13, 12, 10, 9 агъзур манатдин кьадарра аваз пулунин пишкешар, дипломар ва ктабар гана, абурун муаллимриз – гьардаз 5 агъзур манат пул ва дипломар ктабар.

Олимпиадада иштиракай вири аялриз гьардаз 5 агъзур манат пул, сертификатар ва ктабар гана.

Тешкилатчийри милли чIал хуьнин серенжемар кьиле тухуник пай кутазвай Фируза Керимовадиз рикIин сидкьидай сагърай лугьузва.

Куругъли  Ферзалиев