Докъузпара райондин ЦIийи Каракуьреда, Ватан хуьдайбурун йикъаз талукьарна, райадминистрациядин спортдин, жегьилрин крарин ва туризмдин отделди кьил кутуналди, волейболдай кьиле фейи чIехи турнирда райондин зегьметчи коллективрикай ибарат тир 10 командади неинки спортдин, гьакI санлай инсанар тупламишзавай ва руьгь хкажзавай сувар багъишна. Ам ачухуниз талукьарнавай шад мярекатда райондин кьил Мегьамед Шамилова, депутатрин собранидин председатель Салигь Абасова иштиракна.
КIватI хьанвайбуруз, гьакI СВО-да ватандин итижар хуьзвай кьегьалризни сувар тебрик авунин чими келимайрихъ галаз сад хьиз, абуру спортдин ихьтин мярекатрин важиблувиликайни лагьана. Акьалтзавай несил спортдал желб авун ва активнидаказ адал машгъул хьун, экстремизм, терроризм, неонацизм хьтин чIуру завалрин вилик пад кьунин менфятлу серенжемрикай сад тирди, спортди сада-садаз гьуьрмет ийиз чирзавайди, викIегь къилих арадал гъизвайди ва халис ватанпересар тербияламишзавайди къейдна.
ИкI, гзаф къизгъиндаказ кьиле фейи къугъунрин нетижада райондин просвещенидин отделдин командади – 1, администрациядин командади — 2 ва Мискискарин хуьруьн командади 3-чкаяр кьуна.
Гъалибчийрив шабагьарни агакьна: гъиляй-гъилиз къведай Кубок, медалар, грамотаяр ва пулдин пишкешар. ЦIийи Каракуьре хуьруьн кьил Ворудин Шихкеримова самовардин чай хъунни тешкилнавай.
Рагнеда Рамалданова
