Урусатдин пачагьлугъ арадал атай йи­къарилай РагъакIидай патан уьлквейрин ва диндин кьилера авайбур фендигарвилелди­, алдатмишуналди, мез-гъвел ягъуналди, ихьтин амалар кьиле тефидайла, дявейрик­ цIай кутуналди, Урусат чпин гъилик ийиз, усалариз, адан девлетар чапхуниз, халкьар лукI­ви­ле тваз алахъна. Душманвилин, хаинвилин и чIуру,  сиясат абуру къени давамарзава. Гьавиляй Украинада цIай туна, ам Россиядал гьалдарнава. Чи уьлкве вири рекьерай зайифарна, марифатсуз, гьая­суз ивирар илитIна, гьам Россиядин, гьамни Украинадин чилерин, девлетрин иесивалдайвал.

Амма бязи чIулав ниятар кьилиз акъат­натIани, гьелбетда, абуруз кIандайвал жезвач. Гьикьван четин акъвазнатIани, уьл­кве­дин Президентди, гьукуматди вири къурхуйриз, экономикадин къадагъайриз, Украинадин миллетбазрин гьужумриз дурум гана, чи Яракьлу Кьушунрин баркаллу офицерри, игит аскерри, матросри, летчикри, инженервилин, алакъадин къуллугъчийри женгерин майданра гъалибвилер къазанмишзава. И кардиз, са рахунни алач, уьл­кведин кьве вишелай виниз миллетрин векилрин садвили, Яракьлу Кьушунриз куьмекуни къуват гузва.

ЦIийи фашистрихъ, коллективный за­пад­дай рекье тунвай жаллатIрин дестейрихъ галаз женг чIугвазвай Россиядин халкьарин векилри дамахдивди «чун урусар я» лугьузва. Гьа са вахтунда милли адетрални амалзава, хайи халкьдиз, уьлкведиз вафалувални къалурзава. Дяведин махсус се­ренжемда иштиракзавай аскеррин игитвилер гьейранвалдайбур, дамахдайбур я.  Президент Владимир Путина къейд авурвал, цIийи фашистрин винел гъалибвилер къазанмишзавай чи аскерар чеб чпихъ галаз «стха» лугьуз рахазва. Им чи садвилин, тупламишвилин, гъалибвилерин бине, къуват, дестек я. Чи садвал чIурдай къуват садахъни авач.

Ватандин итижар хуьзвай, душмандиз рум гузвай, россиявияр яшамиш жезвай хуьрер, шегьерар азадзавай чи аскеррин викIегьвилер тешпигь авачирбур я. ИкI, Къизляр райондай СВО-диз фенвай 28 йиса авай разведчик-сапёр Закарья Алиев пуд гьафтеда, я недайди, я хъвадайди гвачиз, душмандин гуьллейрин кIаник кумукьна. Багърийриз «куь хва игитвилелди­ телеф хьана» лугьудай хабарни хтанай. Амма ада вични хвена, душмандин аскеррихъ, дронрихъ галаз женгни чIугуна. И агьвалатдикай, адан игитвиликай хабар хьайи вирида гьейранвална. Закарьядиз «къенин йикъан Робинзо Крузо» тIвар гана.

Гьа идаз ухшар викIегьвилин сагьиб мад са дагъустанви я. Февралдин вацра нубатдин тапшуругъдиз фейи жергедин аскер Гьажимурад Къазанбиев душмандин тупарин­ гуьл­лейрик, хъиткьинай затIар бедендик акатна, кIвачел, гъилерал залан хирер хьана. Хирер кутIунна, галчIур жез – галчIур жез, ада патав гвай окопдиз хкадарна. ВСУ-дин дронар цавай кими жезвачир. Сада Гьажи­му­рад авай окопдиз снаряд гадарна. Ам хъиткьинна ва  ракьун цIай квай кIусар чапла патан чекмедиз гьахьна. Аскерди кIа­ра­бар гьикI кIус-кIус хьанатIа гьиссна. Душмандин дрон мад хтана. Гьажимурада вич кьейиди хьиз къалурна ва дрон маса патахъ квахьна.

Окопдай аскердиз тушенкадин пуд банка жагъана. Гьар юкъуз кьуд тIур нез­вай. Адаз чизвачир вич ина гьикьван гагьда амукь­датIа. Чибур патарив гвачир. Душмандин дронар гьамиша цава авай, ракетайрай, тупарай датIана язавай. ЦIекIуьд лагьай юкъуз лап зайиф хьанвай аскер вич-вичивай квахьна. Къутармиш хьунин умудни амачир. Бахтунай, 21-юкъуз ам чи дронар­ идара ийизвайбуруз акуна ва викIегь аскерри Гьажимурад къутармишна.

Чи аскеррин игитвилериз талукь ихьтин мисалар пара ава. Абуру уьтквемвилелди, вафалувилелди Ватандиз къуллугъзава. Гьукуматди аскеррин ва абурун хизанрин гьакъиндай къайгъу чIугвазва.

Чна вири кьегьалриз Ватан хуьзвайбурун югъ тебрикзава.

Абад  Азадов