Шад гьалара тебрикна
16-февралдиз Махачкъалада Кьумукьрин театрдин майдандал республикада кьиле тухвай «Йисан муаллим – 2026» конкурсдин гъалибчидин тIвар малумарна – Каспийск шегьердин «М.К. Мегьамеджанован тIварунихъ галай гзаф хилерин 16-гимназия» МБОУ-дин сифтегьан классрин муаллим Гьажимегьамедова Индира Муминовна. Ада Белгород шегьерда кьиле тухудай Вирироссиядин «Россиядин йисан муаллим – 2026» конкурсда Дагъустан Республикадин патай иштиракда.
Конкурсдин сергьятра аваз имтигьанар 27-январдилай 5-февралдалди пуд майдандал кьиле тухвана. Алай йисуз 37-сеферда кьиле тухвай конкурсди республикадин 40 муниципалитетдай ва региондин къаюмвилик квай кьве идарадай тир 56 муаллим санал кIватIна. Муниципалитетра кьиле тухвай паюна 422 муаллимди иштиракна. Имтигьанрин ачухвал абур кьиле тухузвай чкайрай онлайн-трансляция авуналди таъминариз хьана.
«Йисан муаллим» хкягъуниз талукьарнавай шад мярекатда РД-дин образованидин ва илимдин министерстводин пешекарри, гьукумдин органрин, муниципальный тешкилатрин кьилери, гьакIни республикадин образованидин, илимдин, жемиятдин ва са жерге маса тешкилатрин векилри иштиракна.
РД-дин вице-премьер Муслим Телякавова республикадин кьиле авайбурун патай муаллимриз тебрикдин келимаяр лагьана ва Россиядин халкьарин садвилин йисуз вири теклифар ва гьар йикъан кIвалах Дагъустанда миллетрин арада ислягьвални сих алакъаяр мягькемаруниз талукьарна кIанзавайди къейдна.
«Зун ина бажарагълу, нурлу, чпин пешедал рикIивай машгъул тир муаллимрихъ галаз гуьруьшмиш хьунал гзаф шад я. Муаллим – им анжах пеше я лугьун дуьз туш. Муаллим – им Аллагьдин патай пай, вичиз неинки вахт, гьакI рикIни гузвай вири уьмуьрдин кIвалах я. Муаллимри неинки бажарагъдин сирер агакьарзава, гьакIни, аялриз тербия гуналди, несилрин арада алакъаяр хуьзва, уьлкведин халкьарин садвал мягькемарзава. Муаллимри жегьилар ватанпересвилин руьгьдаллаз тербияламишунин карда къугъвазвай ролдикай заз кьетIидаказ лугьуз кIанзава. Куьне, муаллимри, аялрик жуван ватандал дамах авунин, ам кIан хьунин гьиссер кутазва, керчекни таб, намуслувални вафасузвал тафаватлу ийиз чирзава», — къейдна ада. Разивилин кьетIен гафар ада республикадин дагълух районрай тир муаллимрихъ элкъвена лагьана:
«Муракаб шартIара кIвалахиз, куьне аялрив ерилу образование агакьарун патал вири ийизва, пешедин рекьяй хиве авай мажбурнамадиз вафалувал къалурзава. Дагъустандин образованидин алем вири патал сад хьтинди я, ада алай аямдин истемишунриз вири муниципалитетра сад хьиз жаваб гудайвал авун чун патал акьалтIай важиблу месэла я. Заз квез лайихлу агалкьунар тебрикиз кIанзава. Къуй квехъ мадни еке агалкьунар хьурай, играми муаллимар!».
Идалай кьулухъ мярекат аялрин яратмишунрин дестейрин гьунарар къалуруналди давам хьана – абуру рикIел аламукьдай концертдин программа туькIуьрнавай.
Гуьгъуьнлай, шад мярекатдин сергьятра аваз, «РД-дин йисан муаллим – 2026» конкурсдин лауреатриз сегьнедал атун теклифна.
Къейдна кIанда хьи, «Дагъустан Республикадин йисан муаллим – 2026» конкурсдин кьетIенвилерикай сад агъадихъ галай махсус номинацийрин гъалибчияр хкягъун я: «Акьалтзавай несил экология хуьнин рекьяй гъавурда авайди яз тербияламишунай», «ТIебии илимрин циклдик акатзавай затIар жемятдин гегьенш къатарин арада машгьур авунай», «Гуманитарный дисциплинайрай тарсар гунив яратмишунин тегьерда эгечIунай», «Тарсунихъ тербияламишунин рекьяй авай еке мумкинвиляй», «Урус чIалан михьивал хуьнай», «Пешедиз вафалувиляй», «Акьалтзавай несил ватанпересвилин фикиррал алаз тербияламишунай», Вирироссиядин жемиятдин образованидин кIвенкIвечийрин «Йисан муаллим» тешкилатдин патай «Кьабулун» («Признание»).
Диде-бубайрин ва ученикрин жюридин кIвалахдин нетижада «Диде-бубайрин жюриди кьабулун» ва «Ученикрин жюриди кьабулун» номинацийра гъалибчияр хкязава. ИкI, 2026-йисан конкурсдин пишкешриз лайихлу хьана: Асият Магьмудова (Хасавюртдин 4-СОШ), Наргиз Гьабибуллаева (Дербентдин 16-СОШ), Залина Айдаева (Кьурагь райондин КIирийрин хуьруьн З.Батманован тIварунихъ галай СОШ-интернатдин ингилис чIалан муаллим), Сефинат Рамазанова (Каспийскдин РЦО).
Махсус номинацийра гъалиб хьана: Аминат Омарова (Къизилюрт), Уркуят Зайнудинова (Буйнакск), Людмила Панкова (Къизляр), Екатерина Антонова (Махачкъала), Паша Къулиев (Табасаран райондин ТIинитрин хуьр), Гьажирасул Гьажикьасумов (Махачкъала), Ханум Багамаева (Избербаш).
Къейд ийин, «Гуманитарный дисциплинайрай тарсар гунив яратмишунин тегьерда эгечIунай» номинацияда Ахцегь райондин Луткунрин мектебда обществознанидин тарсар гузвай Альбина Абаскъулиевади гъалибвал къазанмишна.
Санлай къачурла, пулдин сертификатар, кубокар, шабагьар республикадин гьар жуьре пипIерай тир ва муниципалитетра хьайи имтигьанар агалкьунралди вахкай 50 муаллимдив ва конкурсдин финалдиз акъатай 5 муаллимдив агакьна. Мубаракрай!
Жасмина Саидова
