Президентди малумарнавай Россиядин халкьарин садвилин йис Москвада и йикъара шад гьалара ачухна.
«Россия» Милли центрада «Знание» обществоди «Россия – хизанрин хизан!» лишандик кваз тешкилай марафонда чи уьлкведин 89 региондай тир 160-далай виниз халкьарин векилри — 4 агъзурдалай гзаф ксари иштиракна. И мярекатдиз Владимир Путинни атана.
Марафондик гьакI телемост себеб язни Россиядин жуьреба-жуьре пипIерай тир иштиракчийривайни экечIиз жезвай. Президентди, кIватI хьанвайбурухъ, уьлкведин гьар са регионда яшамиш жезвай гьар са агьалидихъ элкъвена, лишанлу вакъиа тебрик авунихъ галаз сад хьиз, цIинин йис халкьарин арада садвал мадни мягькемарзавай, чи зурба Ватан чпин кIвал яз гьисабзавай гьар са кас патал чи умуми тарих рикIел хкизвай ва саналди гележег туькIуьруниз талукьарнавай программайриз бахшнавайди къейдна.
Марафонда Дагъустандин милли сиясатдин ва диндин крарин рекьяй министрдин везифаяр вахтуналди тамамарзавай Темирлан Абуталимовани иштиракна. Машгьур «Лезгинка» ансамблди тамамарай кьуьл марафондин иштиракчийрин рикIера яргъалди амукьдайдаз элкъвена.
* * *
Президентди Россиядин халкьарин садвилинди яз малумарнавай цIинин йис ачухуниз талукьарнавай серенжемдик СтIал Сулейманан райондин Агъа СтIалрин активистарни экечIна. Идакай чаз райадминистрациядин пресс-къуллугъди хабар гана.
Агъа СтIалрин – «XX асирдин Гомеран», Дагъустандин Халкьдин сад лагьай шаир СтIал Сулейманан ватандин – агьалийри уьлкведин гележег патал халкьарин садвилихъ еке къуват, важиблувал авайди тестикьарна. ЧIехи камалэгьли СтIал Сулейманан шиирра лезгияр Урусатдин амай халкьарихъ галаз стхайриз элкъвезвай. Адан гаф неинки лезгидинди, неинки дагъустанвидинди, гьакI вири россиявийринди, инсанвилинди тир. Ада Ватандихъ авай кIанивиликай, адан тIал-квалдикай, лайихлувилерикай са халкьдин векилди хьиз ваъ, гзаф халкьарикай ибарат вири Россиядин векилди хьиз лугьузвай.
Райондин кьил Саид Темирханова къейд авурвал, дуствилелай, са чилел тупламиш хьанвай халкьарин садвилелай зурба къуват авач. И кар Ватандин ЧIехи дяведин йисара чи баркаллу бубайри, исятда СВО-да уьлкведин итижар хуьзвай чи кьегьал рухвайрини – абурун арада 700-далай виниз чи районэгьлияр ава – субутзава. Россияда, 30-далай виниз халкьар дуствилелди яшамиш жезвай, иллаки Дагъустанда гьар са нугъат зурба чIалан кIус тирла, садвал неинки идеал, ам гьар йикъан тежриба я.
* * *
Россиядин халкьарин садвилин йис Кьурагьрин центральный библиотекадани шад гьалара ачухна. Анин пешекарри «Халкьар гзаф — уьлкве сад» лишандик кваз стендар гьазурнавай, кIелдайбурухъ галаз садвал, дуствал мягькемаруниз талукьарнавай мярекатни кьиле тухвана. Анал Кьурагьрин 2-нумрадин юкьван школадин аялри уьлкведиз, халкьарин дуствилиз бахшнавай шиирарни хуралай кIелна.
Чи мухбир
