2026-йисуз Дагъустанда чкайрилай теклифрин бинедаллаз арадал гъанвай 54 проект кардик кутада. Идакай РД-дин экономикадин ва мулкар вилик тухунин министр Гьажи Султанова и йикъара кьиле фейи пресс-конференциядал хабар гана.
Республикада 2019-йисалай кардик кутунвай «Чкайрилай теклифар» программа хуьрерин чкайриз куьмек гунин важиблу алат яз амазма. Адан кьилин метлеб чкайрал яшайишдин рекьяй арадал къвезвай месэлаяр гьялун ва мулкар экономикадин рекьяй вилик тухуз куьмек гун я.
Проект кьилиз акъудиз башламишай сифте кьилелай инихъ тахминан агъзур арза агакьнава, абурукай 534 теклифдиз финансрин куьмек ганва. Санлай къачурла, министрди хабар гайивал, тахминан пуд миллиард манатдин такьатар чара авуна, регионрин, районрин бюджетрай ва гьакIни бюджетдилай къерехдай тир такьатар желбнава.
Пулдин такьатар образованидин идараяр, культурадин центраяр эцигуниз, спортдал машгъул жедай майданар туькIуьруниз ва я алай аямдин истемишунрив кьадайвал авуниз, рекьерин, цин, газдин турбаяр авай гьал хъсанаруниз, электричестводалди таъминаруниз ва, санлай къачурла, инсанар яшамиш жезвай чкайра къулай шартIар ташкилуниз серфзава.
Министрди хабар гайивал, программа уьмуьрдиз кечирмишзавай жуьре датIана хъсанарзава. 2023-йисуз чкайрилай къвезвай арзайриз килигдай къайда дегишарна – ида проектар, яргъал вегьин тавуна, гъиле кьадай мумкинвал гана. 2024-йисуз бюджетдин такьатар тIимилбур тир районриз куьмек гунин къайда кардик кутуна ва идалди программа уьмуьрдиз кечирмишзавай чкайрин сергьятар гегьеншарна. Гила гьар са район гъалиб хьайи проектрин тайин тир кьадардалди сергьятламишнава – ида вири такьатар са гъилиз финин вилик пад кьадай мумкинвал гузва. Малум хьайивал, къведай йисуз азад такьатар пайда хьайи дуьшуьшра конкурсдин алава тир сессияр тешкилдай тежриба кардик кутада – ида виридалайни важиблу проектриз куьмек гудай рехъ ачухда.
2026-йис патал Дагъустандин бюджетда чкайрилай теклифриз талукь проектриз финансар чара авуниз 250 миллион манат фикирда кьунва. Конкурсдин сергьятра аваз, хкягъунин алай вахтунда кардик квай пай алатайла ва комиссиядин алава заседание кьиле тухвайдалай кьулухъ республикадин 26 районда 54 проект гъиле кьун пландик ква. Министрди къейд авурвал, программади виниз тир нетижалувал къалурна ва, агьалийрин игьтияжар ва регион еримлу авунин карда вилик эцигнавай макьсадар фикирда кьуналди, адан кIвалах давам жеда.
Жасмина Саидова
