Мукьвара РД-дин Кьил Сергей Меликован Указдалди чи ватанэгьли Рашид Бекероваз «Дагъустан Республикадин искусствойрин лайихлу деятель» тIвар ганва.
Къейд ийин хьи, Рашид Бекеров Хасавюрт райондин Къурушрин хуьряй я. Алай вахтунда ада Дагъустандин халкьдин алатрин государстводин оркестрдин дирижер яз кIвалахзава. Ам гьакIни «ETHNO BAND» тIвар алай ВИА-дин художественный регьбер я.
Рашид Бекерован тIвар неинки са чи республикада, гьакIни адалай къецепатани машгьур я. Адан «Концертное попурри на дагестанские темы» тIвар алай яратмишуниз Вирироссиядин «Современная музыкальная карта России» проектда еке къимет гана ва ам «Россия – Культура» телеканалдай къалурна. Лагьана кIанда, Р. Бекерова лезги халкьдин милли манийрал чан хкунизни кьетIен фикир гузва.
Чна чи ватанэгьлидиз агалкьун мубаракзава ва адахъ яратмишунрин рекьяй мадни вилик фидай мумкинвилер хьун алхишзава.
Агьмед Магьмудов
