2026-йисан 1-январдилай къуватда гьатнавай дегишвилерин бинедаллаз, уьлкведин регионриз «Роскадастр» ППК-дихъ, идалай вилик гьисабдиз къачунвай, амма хсусиятдин ихтиярар регистрация тавунвай юзан тийидай эменнидин объектрихъ галаз, вири терефар фикирда кьуна, кIвалах тухун патал ихтиярар гузвай икьрарар кутIундай мумкинвал ганва. Инал ихтилат гзаф йисарин вилик гьисабдиз къачунвай, амма хсусиятчивилин ихтиярар тестикьар тавунвай яшайишдин кIвалерикай, чилерин участокрикай ва майишатдин дараматрикай физва.
Дагъустандин чилерин ва эменнидин алакъайрин рекьяй министерстводи ва «Роскадастр» ППК-дин республикада авай филиалди, куьлуь-шуьлуьярни кваз, ихьтин икьрардин кьетIенвилер веревирд ийиз башламишнава. Дагъустанда Роскадастрдин филиалдин директор Апанди Дагуева хабар гайивал, цIийиз кардик кутунвай къайдади фадлай вилик акъвазнавай и месэла гьялдай мумкинвал гуда.
«Чи республикадихъ гьакъикъатда ишлемишзавай, амма законлудаказ гьисабдиз къачун тавунвай гзаф объектар ава. Ида гьам агьалияр, гьамни муниципалитетар, гьакIни санлай экономика патал четинвилер арадал гъизва. Гьаниз килигна, чи вилик акъвазнавай кьилин месэла и объектар законлу терефдиз акъудун я», — къейдна А. Дагуева.
Винидихъ вичикай лагьанвай икьрар кутIунайдалай кьулухъ Роскадастрдивай эменнидин иесияр вужар ятIа тайинарунин, кадастрдин гьахъ-гьисабар авунин, лазим тир вири документар гьазурунин, гьакIни геодезиядин ва картографиядин кIвалахар кьиле тухунин карда куьмекар гуз жеда.
«Роскадастр» ППК-дин Дагъустанда авай филиалдин директордин заместитель Вадим Алибегован гафаралди, и икьрардин нетижаяр агъзурралди агьалийри гьиссдайбур жеда: «Агъзурралди дагъустанвийривай чпин кIвалерин ва чилерин иесивилин ихтиярар кьезил къайдада тестикьариз ва идалди абур законлудаказ хуьз жеда. Гьуьжет алай чилерин кьадарни виле акьадайвал тIимил жеда. Идалайни гъейри, муниципалитетрив юзан тийидай эменнидин фондуниз талукь дуьм-дуьз делилар агакьда. Ида лагьайтIа, мулкар вилик тухуниз талукь планар авайдалай менфятлудаказ туькIуьрдай ва налогрин гьисабдай бюджетдин къазанжийрин пай гзафардай мумкинвал гуда». Ада гьисабзавайвал, объектар экономикадин хилез желб авуни юзан тийидай эменнидин базар еримлу, ипотекадин кредитар чара авунин жигьетдай къулай шартIар тешкилда ва инвестпроектар патал мулкарин къешенгвал артухарда.
Саида Мурадова
