Алатай гьафтеда Дербент шегьерда «Семафор» газетдин 15 йис тамам хьуниз талукьарнавай шадвилин мярекат кьиле фена. Ам хейлин йисара «Лезги газетдин» редакциядихъ галаз алакъаяр хвейи мухбир, шаир, Кеферпатан Кавказдин ракьун рекьерин гьуьрметлу къуллугъчи Гьажиагъа Мегьамедшерифова 2011-йисуз арадал гъанай. 2025-йисан майдилай газетдин кьилин редактордин везифаяр Адиширин Алибегова (Адиширин Ялахъви) тамамарзава.
Юбилейдин мярекат Дербентдин ракьун рекьерин къуллугъчийрин ветеранрин советдин председатель Абдулмежид Муслимова кьиле тухвана. Ана, газетдин редакциядин векилрилай гъейри, Дербент шегьердин ветеранрин советдин председатель Гьажимурад Гьажимурадова, филологиядин илимрин кандидат, гьикаятчи Сардар Абила ва масабуру иштиракна.
Адиширин Алибегова редакциядин къуллугъчийрив – Тахмираз Имамовав, Пейсагь Мишиевав, Амирхан Мегьамедшерифовав гьуьрметдин грамотаяр вахкана.
Къейд ийин хьи, «Семафор» газетдин редакциядин коллективдиз и шад вакъиа РФ-дин журналистрин союздин Дагъустандин отделенидин председатель, «Лезги газетдин» кьилин редактор Мегьамед Ибрагьимовани мубаракна.
Чи мухбир
