17-январдиз 140-нумрадин Ахцегьрин погранотрядди вичин 30 йисан юбилей къейдна. Шадвилин мярекатар райцентрада ва РФ-дин Игит М. Мегьамеджанован тIварунихъ галай Луткунрин школадин чIехи залда кьиле фена.
Мярекатра сергьятчи аскеррилайни ветеранрилай гъейри, Ахцегь, Рутул, Докъузпара районрин кьилери, къайдаяр хуьдай органрин, жемиятдин тешкилатрин, СМИ-дин векилри, СВО-дин ветеранри ва теклифнавай маса юлдашри иштиракна. Тебрикрин рахунрилай вилик абуру Донбассдин чилел цIийи фашистарни нацистар уьтквемвилелди тергзавай чи кьегьалриз сагърай малумарна, Ватан патал чанар къурбанднавай СВО-дин игитар эбеди рикIел хуьн яз, са декьикьада кисна акъвазна.
Чпин рахунра абуру сергьятчийриз юбилей мубаракна, алай вахтунда уьлкведа ва дуьньяда арадал атанвай четин гьалара Ватандин кьиблепатан сергьятар умудлудаказ хуьнин, общество яшайишдинни экономикадин рекьяй мягькемарунин ва, кьилинди, халкьдин хатасузвал таъминарунин карда сергьятчийрин къуллугъдин важиблувал къейдна, абуруз пак къуллугъда агалкьунар хьун алхишна.
Мярекатрин сергьятра аваз, чешнелудаказ къуллугъзавай са жерге аскерар ва акьалтзавай несил ватанпересвилин руьгьдаллаз тербияламишунал машгъул чкадин властдин векилар талукь тир шабагьралди къейдна. КIватI хьанвайбурун гуьгьуьлар РФ-дин погранкъуллугъдин управленидин кьуьлеринни манийрин ансамблдин артистри ва райондин культурадин управленидин гьевескарри шадарна.
Дашдемир Щерифалиев
