Рекьериз талукь яз
РД-дин транспортдин ва рекьерин майишатдин министерстводин телеграм-каналди раижзавайвал, 2026-йисуз Дагъустанда, «Уьмуьр патал инфраструктура» милли проектдин сергьятра аваз, са жерге серенжемар кьиле тухун пландик кутунва. Кьилди къачуртIа, абурун арада ихьтин мярекатар ава:
автомобилрин 523,1 агъзур кв.м. рекьера къирдикайни бетондикай ибарат къаришма цун;
Махачкъаладин агломерацияда 46,5 миллион манатдин ИТС (интеллектуальная транспортная система) кардик кутунин мярекатар уьмуьрдиз кечирмишун;
РД-дин региональный ва межмуниципальный метлебдин умумидаказ ишлемишдай автомобилрин рекьера 66,9 километрдин мензилда кIвалахар кьиле тухун.
2026-йисуз рекьерин региональный сетда 21 объект уьмуьрдиз кечирмишун пландик кутунва, абурукай 18-даз талукь икьрарар кутIуннава.
222 агъзурдалай гзафбуруз
РД-дин зегьметдин ва яшайишдин рекьяй вилик финин министерстводин яшайишдин рекьяй хуьдай управленийри 2025-йисуз кьилдин категорийрик акатзавай 222,7 агъзур агьалидиз яшайишдин кIвалерай ва коммунальный къуллугърай гайи гьакъидин эвездин харжияр хганва. Идакай и ведомстводин телеграм-каналди раижзава.
Кьилди къачуртIа, абурун арада ава: умуми начагъвилер авай инвалидар — (инвалиды общего заболевания) — 93 830; чпихъ инвалид аялар авай хизанар — 9052; зегьметдин ветеранар — 32 292; гзаф аялар авай хизанар — 10 237.
Эвездин пулдин кьадар, яшайишдин майдандин ва коммунальный къуллугъар ишлемишунин нормативриз килигна, республикадин стандартрал асаслу яз, гьар са агьалидиз кьилди тайинарзава.
Сад лагьайди
Дагъустанда сагъламвилин мумкинвилер сергьятламиш хьанвай (ОВЗ) аялар патал тайин рекьяй стоматологиядин сад лагьай отделение ачух хьанва. Идакай «Дагъустан» РИА-ди раижзава. Ам М. Максудован тIварунихъ галай Республикадин стоматологиядин поликлиникада кардик кутунва.
Медицинадин идарадин базадал алай стоматологиядин отделениди вацран къене тахминан 500 аял патал сагъардай серенжемар кьиле тухун гьисаба кьунва. Гила аялрин отделенида ОВЗ авай аялар сагъарунин серенжемар пулсуз кьиле тухудай цIийи чка ачухнава. ГьакIни ОВЗ авай аялдиз операцияр ийидай чкада, духтур-анестезиологдин гуьзчивилик кваз, «дармандалди ахвара туналди» сагъардай мумкинвални ава. И кар патал ИВЛ аппарат къачунва, операция авурдалай кьулухъ гуьзчивалдай кIвал, реанимациядин ва хирургиядин кабинетар кардик ква. Герек тир маса тадаракарни къачунва.
Газ тухванва
«Дагъустан патал газ» телеграм-каналди хабар гузвайвал, «Догазификация» программадин сергьятра аваз, республикада 2025-йисуз тахминан 2 агъзур кIвалин участокрин сергьятрал кьван газдин сетар тухванва. Санлай къачурла, шаз программада иштиракун патал 3,5 агъзурдалай гзаф агьалийри арзаяр вугана.
Виридалайни гзаф арзаяр Хасавюрт, Дербент ва Къизилюрт районра уьмуьрдиз кечирмишнавайди къейднава.
«Газпром газораспределение Дагестан» ва «Газпром газораспределение Махачкала» компанийрин регьбер Ризван Мурадова къейдзавайвал, и хилен пешекарри догазификациядин программа уьмуьрдиз кечирмишун патал тешкиллу кIвалах кьиле тухузва — агьалияр газдалди таъминарунин еришрик гьерекат кутунин макьсаддалди алава механизмаярни кардик кутазва.
Агъуз аватнава
Дагъустанда зур йисан къене сифте яз бензиндин къиметар агъуз аватнавайди къейднава. Идакай «Дагъустандин экономика» телеграм-каналди хабар гузва.
«Росстатдин делилралди, Дагъустанда эхиримжи ругуд вацран къене автомобилрин бензиндин кура-кура маса гудай къиметар агъуз хьанвайди къейднава», — раижзава чешмеди.
Гьа са вахтунда 2026-йисан 1-январдилай 12-январдалди республикада кудайдан къимет 1,2 процентдин тIимил хьанва.
РФ-дин 78 субъектда январдин сифте йикъара кудайдан къиметар хкаж хьанвайди къейднава. Виридалайни гзаф Магадандин областда (+3,3 процент) ва Чукоткадин автономный округда (+2,7 процент) багьа хьанва.
Гьазурайди — Муса Агьмедов
