2026-йисан 1-мартдилай цIийи къайда кардик кутада: бюджетдин гьисабдай, яни пулсуздаказ чирвилер къачур ординатурадин выпускникар тайин кьадар вахтунда чпи къачунвай пешекарвиляй духтурар яз кIвалахуниз мажбур жеда. КIвалахдин чкайралди абур гьиниз рекье туртIа, гьана таъминарда. Идакай алатай йисан эхирдай уьлкведин Президент Владимир Путина 2025-йисан нетижаяр кьадай вахтунда хабар ганай.
«Жегьил пешекарри чарасуздаказ кIвалахун лазим тир вахт хуьрерин чкайра — куьруьди, шегьерра яргъалди жеда», — лагьанай ада. ГьакIни ада къейд авурвал, и жигьетдай къарар вузда кIелзавай студентди вичи кьабулун лазим я: эгер гележегдин духтур вич рекье тур чкада чарасуз яз кIвалахиз гьазур туштIа, адаз икьрар кутIунуникай отказдай ва чирвилер гьакъидихъ къачудай къайда хкядай ихтияр ава.
Амина Муслимова
