Алай йисан 4-февраль Россиядин мулкунал 11-классар акьалтIарзавайбуру нетижаяр кьадай сочинение (изложение) (ИС-11) кхьидай алава югъ я. Ам галачиз ГИА-дин имтигьанра иштиракдай ихтияр гудач. И югъ, гьар жуьредин себебар аваз, ихьтин имтигьанда асул вахтунда иштиракиз тахьайбур патал чара авунва. Нетижаяр кьадай сочинение (изложение) кьвед лагьай сеферда кхьидай ихтияр ава:
. имтигьан рази тежедай къиметдалди вахкай («незачет») выпускникриз;
. кваз кьадай хьтин себебар аваз — азарлу яз ва я маса (документралди тестикьарнавай) себебралди ИС-11 вахкузвай чкадиз татай аялриз;
. гъиле кьунвай кIвалах, кваз кьадай себебар аваз, эхирдал гъиз агакь тавур аялриз;
. ИС-11 кхьизвай чкадай тайинарнавай къайда чIурун себеб яз акъуднавай иштиракчийриз.
Нетижаяр кьадай сочиненидин (изложенидин) нетижаяр образованидин идарайра ва я ИС-11-да иштиракун патал регистрация авунвай чкайра (документар гьи жуьреда вуганватIа, гьадалай аслу яз) чириз жеда.
РикIел хуьн важиблу я: ГИА-да иштиракдай ихтияр гунин шартI тир нетижаяр кьадай сочинение (изложение) вахт алат тийидайди я. Яни нетижалудаказ вахканвай «зачетдин» къуват садрани квахьдач ва ам гуьгъуьнин йисара, са кьадар вахт алатайла, мад сеферда вахкунин лазимвал авач.
Амина Муслимова
