Рособрнадзорди рикIел хкизва: 2026-йисан ЕГЭ-да иштиракун патал арзаяр 1-февралдалди гун лазим я. 1-февраль  гьяд югъ тирвиляй, арзаяр агакьардай вахт 2-февралдал (и югъни кваз) кьван давамарнава.

Алай йисуз мектебар акьал­тIар­за­вайбуру арзаяр чпин мектебра гун лазим я, экстерндин программайрай­ кIелзавайбуру — государстводин­ ак­кре­дитация авай гьи мектебдиз хьайи­тIани. Алатай йисара мектебар акьал­тIарнавай жегьилри образованидин уп­равленидин региондин органрин официальный сайтра къалурнавай чкайра арзаяр  регистрация авун лазим я.

Арзаяр выпускникри чпи ва я абурун диде-бубайри (законлу векилри) чеб вужар ятIа тестикьарзавай  шагьадатнамайрин бинедаллаз гана кIанда. ГьакIни ЕГЭ-да иштиракун патал арза и кар патал векилвилер ганвай маса касдивай — вич вуж ятIа тестикьарзавай ва ихтибар авунин  документдал асаслу яз — гуз жеда.

Сагъламвал себеб яз сергьятла­мишвилер авай ксари психолого-ме­ди­ко-педагогикадин комиссиядин меслятар къалурнавай документ ва я адан гьакъикъивал тестикьарнавай копия ага­­­кьарун лазим я. Инвалидри ва я инвалид аялри чпин набутвилин гьакъин­дай справка ва я адан гьакъикъивал­ тес­тикьарнавай копия агакьарна кIан­да. Алатай йисарин выпускникри об­ра­зование къачунвайвилин гьакъиндай документар ва я абурун гьакъикъивал тестикьарнавай копияр вугун лазим жеда. Къецепатан уьлкведин документ ва я адан гьакъикъивал тестикьарнавай копия нотариусди тестикьар­навай таржума галаз вугуда.

Колледжрин студентри, арзаяр агакьардайла, чпи чирвилер къачур образованидин идарадай къачунвай ва юкьван  умуми образованидин программаяр акьалтIарнавайди тестикьарзавай ва я абур кIелунин алай йисан эхирдалди акьалтIардайди тестикьарзавай  справкани вугун лазим я.

2026-йисан ЕГЭ-дин расписание:

.  асул вахтунилай фад кьиле ту­худай пай: 20-мартдилай 20-апрел­далди;­

.  асул пай: 1-июндилай 9-июлдалди;

.  алава тир пай: 4-25-сентябрдиз.

Амина Муслимова