Ихьтин лишандик кваз 16-январдиз Махачкъалада, Р. Гьамзатован тIварунихъ галай милли ктабханада, Россиядин фотохудожникрин союздин член, «Александр Невскийдин тIварунихъ» конкурсдин лауреат, международный ва Россиядин конкурсрин иштиракчи, 2008-йисалай камера гваз рикI алай кардиз вахт серфзавай Юсиф Саркарован шикилрин выставка ачухуниз талукьарнавай шад мярекат кьиле фена. Ана республикадин яратмишунардай интеллигенциядин векилри, искусстводал машгъул пешекаррини рикI алай ксари, автордин багърийри ва ярар-дустари иштиракна.
Выставкада Кьиблепатан Дагъустандин 4 райондиз — Ахцегь, Рутул, Докъузпара, Мегьарамдхуьруьн ва Дербент шегьердиз талукь шикилри, гьакI кьилдин ксарин портретри чка кьунва.
Милли ктабханадин 1-мертебада выставкаяр кьиле тухун патал чара авунвай чка, дугъриданни, гуьрчег пипIез элкъвенвай. Дагъустандин Кьиблепата авай, гьакIни амачир хуьрерин, тIебиатдин надир пипIерин, чарчаррин, гьайванрин, набататрин, вацIарин, муькъверин, санлай къачурла, 70-далай виниз шикилри — гьар сада вичин вахтунин сирлувал, гьейранардай къуват, тарих хуьзвай эсерри — выставкадин тамашачияр хайи макан жуьреба-жуьре патарихъай ачухзавай сиягьатдиз тухузвай…
Мярекат Милли ктабханадин культурадин программайрин отделдин заведующий Ольга Алиевади ачухна ва кьилени тухвана. Мярекатдал рахай вирида Юсиф Саркарован тIварунихъ, ам къени къилихрин ачух инсан, гележегдин къайгъудар яз, акьалтзавай несил хайи ватандал кьару яз, чIехи хьуник лайихлу пай кутазвай ватанперес, гьакIни тарих, хайи макан гуьрчег шикилралди къалурзавай бажарагълу устад тирди къейд авун, адан шикилриз зурба къимет гун яз лагьай келимайри, выставкадин кIвалахри кIватI хьанвайбурун гьар садан рикIиз гужлудаказ таъсирнавайди, абуруз руьгьдин девлетлу ем ганвайди тестикьарзавай. ИкI, чи ватанэгьлидин искусство кьетIендаказ къейд авурбурун арада Дагъустандин художникрин союздин председатель Къурбанали Мегьамедов, Дагъустандин халкьдин художник Амирхан Амирханов, Дагъустандин писателрин союздин лезги секциядин секретарь Максим Алимов, РФ-дин искусствойрин лайихлу деятель Хан Баширов, ДГУ-дин аспирант ва муаллим Ахмедия Магьадов, Юсиф Саркарован чIехи стха — Вирироссиядин изобретателрин ва рационализаторрин обществодин ДРО-дин председатель Нуьсрет Саркаров, Дагъустандин машгьур фотохудожник Камиль Чутуев ва масабур авай.
РД-дин Общественный палатадин председателдин куьмекчи Гьасангьуьсейн Абдулжелилова Юсиф Саркарован тIварунихъ чими келимаяр лагьана ва искусстводик кьетIен пай кутунай адаз хурудал алкIурдай «Генерал-полковник М.Т. Танкаеван» гьуьрметдин лишан гана.
Чи ватанэгьлидив и юкъуз лишанлу са шабагь мадни агакьна. Р. Гьамзатован тIварунихъ галай ДГПУ-дин тербиядин ва яшайишдин рекьяй кIвалахдин проректор Руслан Гереева гьакъисагъ зегьметдай, пешекарвиляй ва ватанпересвилин тербия гуник пай кутунай Юсиф Саркаровав Чухсагъулдин чар вахкана.
Юсиф Саркаров 1959- йисуз Ахцегьа дидедиз хьана. Хайи хуьруьн мектеб, Дагъустандин хуьруьн майишатдин институт акьалтIарна. Хуьруьн майишатдин колледжда тамам 30 йисуз информатикадин тарсар гана. Гьеле школада амаз кружокра машгъул жедайла, ам фотоаппарат гваз хайи ерийра къекъвена, рикIиз таъсир авур гьар са затI, легьзе шикилра хуьн кьетIна. Гьа чIавалай шикилар ягъун адан рикI алай кардиз элкъвена. 2008-йисалай, винидихъ къейднавайвал, ам и пешедив мадни рикI гваз эгечIна. Малум хьайивал, адахъ 65 агъзурдалай виниз шикилар ава. Алай вахтунда ам вичихъ вишералди авай плёнкайрилай шикилар рекъемринбуруз элкъуьрунал машгъул я. Ада абур жуьреба-жуьре сайтрани эцигзава. Кьилди къачуртIа, Россиядин «Плантариум» сайтда чи ватанэгьлиди 1500-далай виниз набататрин шикилар эцигнава. Инал къейд ийиз кIанзавай кар мадни ам я хьи, дагъустанвийрикай сайтдихъ галаз алакъа хуьзвай, ана шикилар эцигунал машгъул тир кас мад авач.
Къейд ийин хьи, ктабар чапдай акъуддайла, Юсиф Саркарован шикилрикай гегьеншдаказ менфят къачузва. Кьилди къачуртIа, Ахцегь райондикай акъатнавай ктабра (автор — Дашдемир Шерифалиев) абуру еке чка кьунва.
Меркезда выставка са вацра давам жеда. РикIел хкин: Ю. Саркарован выставкаяр икьван гагьди Ахцегь, Докъузпара районра ва Дербентдани кьиле фена.
Рагнеда Рамалданова
