Россиядин агьалийрин вил Украинадин миллетбазри кьил кутур метлебсуз, инсафсуз, хаин дяведин гьерекатар куьтягь хьунал ала. Коллективный западдин гъуьнтIуьник, къаюмвилик акатнавай Зеленскийдин дестеди дяве акъвазар тавун патал чпелай алакьдай кьван алчах, къанлу крар ийизва. Тупарай, ракетрай школаяр, больницаяр, ресторанар, яшайишдин кIвалер язава. Халис фашистриз элкъвенвай душманар тергзавай дяведин махсус серенжемда лезги халкьдин рухвайрини Россиядин Яракьлу Къуватрин кьушунрик кваз викIегьвал, жуьрэтлувал къалурзава. Гьахьтин кьуд хциз Россиядин Игитвилин тIварар, цIудралди офицерриз, аскерриз орденар, медалар ганва. Ахьтинбурукай сад Мегьарамдхуьруьн райондин Къуюстанрин хуьряй тир Улдузхан Шабанов я.
Улдузхан Шакир ва Муминат Шабановрин хизанда Махачкъала шегьерда дидедиз хьана. Йисар XX асирдин эхиримжибур тир ва Советрин Союз лугьудай уьлкве амачир. Россияда гзаф крар къайдадикай хкатнавай, шегьерда яшамиш хьунни четин акъвазнавай. Шакир Шабанов хизанни галаз хайи хуьруьз хъфена. Улдузханани диде-бубадихъ галаз хуьруьн яшайиш кьабулна. Школадани кIелиз, ада диде-бубадиз майишатдин кIвалахарни ийиз куьмек гузвай. Хизанди малар, лапагар, къушар хуьзвай.
Юкьван школа куьтягьайла, Улдузхана Мегьарамдхуьре кардик квай водителар гьазурдай школада кIелна. Армиядин жергейриз эверайла, ада къенепатан кьушунрин частара къуллугъна. Хуьруьз хтайдалай гуьгъуьниз ада вичивай жедайвал зегьмет чIугвазвай.
2022-йисан февралдин вацра Россиядин Яракьлу Къуватар Донбассдин чилел дяведин махсус серенжемдив эгечIайла, Улдузханавай секиндиз чими къулав ацукьиз хъхьанач. Ам вичин диде-бубадиз, уьмуьрдин юлдашдиз, хва Ибрагьимаз сагърай лагьана, Ватандин вилик буржи тамамариз фена.
Водителдин руль яракьдалди эвезай Улдузхан Шабанов Запорожьедин областдиз акъатна. Сифте вахтара ада вич хьтин жегьил аскеррихъ галаз окопар эгъуьнна, блиндажар, даяхар туькIуьрна. Душмандихъ галаз женг чIугвадай югъни атана. Ада къуллугъзавай ротадиз миллетбазрин гъиле авай ва чи кьушунрал тупарай гуьллейрин хар къурзавай десте терг авунин тапшуругъ гана.
— Авайвал лагьайтIа, сифте декьикьайра кичI квай, — рикIел хкизва У. Шабанова. — Дяве я кьван. Амма патав командирар, юлдашар гвай. Командирдин тапшуругъар чна ян тагана кьилиз акъудзавай. Чун гъавурда авай, душмандин вилик зайифвал авун чаз кутугнавач. ГьикI лагьайтIа, гьахъвал чи пата ава. Чи гьужумдиз душмандивай дурум гуз хьанач. Абур чпин сенгерарни туна, катна. Заз ва зи юлдашризни акуна, миллетбазрин арада наемникарни пара авай. Абур полякрин, ингилис ва маса чIаларал рахазвай.
Шабановакай «Махачкалинские известия» газетда кхьенвайвал, чи аскерар блиндажра махсус чувалра ксузвай, тIуьн-хъунни абуру чпи гьазурзавай. Бязи вахтара чин-гъил чуьхуьдай вахтни жезвачир, я ядни гьатзавачир. Миллетбазрихъ галаз женгер датIана кьиле физвай. Абурун гъиляй яваш-яваш са-са метр чил, са-са хуьр ахкъудзавай. Гадни, зулни алатна, кьуьд атана. Нубатдин са женгина Улдузханал залан хер хьана, ам вич-вичивай квахьна. Полог шегьердин госпиталдиз аватай адав сифтегьан куьмек гана. Хирер сагъ хъхьайла, ам Херсондин областдиз рекье туна. Инани ада Украинадин миллетбазрикай Донбассдин чилер азад авунин карда викIегьвилелди иштиракна.
Херсондин областдин хуьр душмандикай азаддай вахтунда У. Шабановахъ минометдин гуьллеяр галукьна. Госпиталда ам сагъар хъувун патал духтурри хейлин зегьмет чIугуна. Абуру акъудай къарарни сад тир: мад женгера иштиракдай сагъламвал вахъ авач.
Гьа икI, викIегь аскер хайи хуьруьз диде-бубадин, вичин хизандин патав хтана. Ада къизгъин женгера иштиракайвилин шагьидар Шабанован хурудал алай шабагьар я: «Дирибашвиляй», «Женгинин стхавал», «Намус, баркаллувал, жуьрэтлувал» медалар. Алай вахтунда къагьриман аскерди ислягь уьмуьр давамарзава. Райондин школьникри адаз гуьруьшриз эверзава.
Хийир Эмиров
