1921-йисан 20-январдиз Вирироссиядин Центральный Исполнительный Комитетди ДАССР тешкилунин гьакъиндай декрет кьабулнай ва Дагъустандин государстводин бинеяр кутунай. Гегьенш ихтияррин ва азадвилерин иеси хьайи Дагъустанди са куьруь вахтунда халкьдин майишатдин хейлин хилерай виликди еримишна, вичихъ зурба крар тамамардай мумкинвилер, къуватар авайди субутна. 105 йисан тарихди шагьидвалзавайвал, чи къенин ва гележегдин абадвал, мублагьвал, агьваллувал Россиядин халкьарихъ галаз садвал хуьнихъ ва ам мадни мягькемарунихъ галаз алакъалу я.
Республикадин Кьил Сергей Меликова Дагъустандин Автономиядин 105 йис тамам хьун вири агьалийриз тебрикна ва ада кхьена:
«Дуьм-дуьз 105 йис идалай вилик, 1921-йисан 20-январдиз, ВЦИК-дин декретдалди ДАССР тешкилна ва государстводин дибар закондин рекьелди тестикьарна. Гьа идалди Вирироссиядин умуми кьисметдихъ галаз сад авунвай Дагъустандин халкьарин тарихдин цIийи чинар ачухна.
Вири уьлкведин халкьарихъ галаз санал дагъустанвийрини гьакъисагъвилелди зегьмет чIугуна. Ватандин ЧIехи дяведин йисара хайи чил викIегьвилелди хвена. Асирар дегиш жезвай вахтунда Россиядин государстводин аслу туширвал игитвилелди хвена. Къени чна, чеб патал хаталувилизни килиг тавуна, Ватандин итижар хуьзвай, майдандиз ахкъатнавай цIийи фашистрихъ галаз уьтквемвилелди женг чIугвазвай ва чпин вилик эцигзавай везифаяр игитвилелди тамамарзавай ватанэгьлийрал дамахзава.
«Россиядин халкь сад ва тупламиш хьайила, чав барабарбур авайди туш», — лагьанай уьлкведин Президент Владимир Путина. 2026-йисни ада Россиядин халкьарин садвилинди яз малумарнава.
Инанмиш я, республика мадни вилик фин, абад хьун патал чна вири къуватар эцигда. Чи жегьилриз чкадал кIвалах жедайвал, абуру мягькем хизанар арадал гъидайвал ва Дагъустандин тарих мадни виш йисаралди давам жедайвал.
Къуй ислягьвал, виридаз хъсанвилер, хушбахтлувал хьурай».
Абад Азадов
