Зегьметдин книжкаяр

СФР-дин (Социальный фонд России)­ Дагъустанда авай отделениди кIва­лах­завай агьалийриз зегьметдин (электронный) 850 агъзур книжка туькIуьрнава. Идакай СФР-дин РД-да авай отделенидин телеграм-каналди хабар гузва.

ЭТК (электронная трудовая книжка) виче агьалидин зегьметдин кIвалахдикай малуматар авай рекъемдин документ я. Ам кIвалах гузвайбуру гьар вацра гьазурзавай гьахъ-гьисабрин бинедаллаз туь­кIуьрзава ва вични СФР-дин делилрин сад тир базада хуьзва.

ЭТК-дихъ алава ихьтин артуханвилер ава:

—  хсуси делилар хуьнин ва абур амукьунин дережа екеди я;

— ам квадариз ва чIуриз жедач;

— зегьметдин стаждиз талукь гъа­латI­ квай ва дуьз тушир малуматар гьа­ту­нин мумкин тир хаталувал лап тIимил я.

Эгер электронный книжкадин делилар чарчел кIанзаватIа, СФР-дин РД-да авай отделениди ихьтин документарни гузва. Абур СФР-дин регионрин отделенийрин муьштерийриз къуллугъдай офисрай ва я МФЦ-дай къачуз жеда.

Чешмеди къейдзавайвал, электронный­ книжкадин делилар гьакIни кIвалах­дал­ таъ­минарнавайдавайни къачуз жеда, анжах — адан гъилик кIвалахзавай муд­датда.

АкьалтIарнава

Вичин гужлувал 102,3 МВт-дикай ибарат тир Дербентдин ракъинин электростанция эцигна акьалтIарнава. Идакай РД-дин энергетикадин ва тарифрин министерстводин сайтда хабар гузва.

Чешмеди къейдзавайвал, и станцияди (СЭС) элекроэнергия гьасилунин йисан пландин кьадар саки 160 млн кВт·ч-дикай ибарат жеда.

Объект 2026-йисан 1-кварталда ишлемишиз вахкудайвал я.

Фикир желбзава

РД-дин энергетикадин ва тарифрин­ министерстводин пресс-къуллугъди газ яшайишдин шартIара ишлемишунин къай­даяр лап кIевелай вилив хуьн важиб­лу тирдакай идалай вилик са шумуд сеферда хабар гана. Гьайиф хьи, газдалди зегьерламиш хьунин дуьшуьшар арадал атун давам жезва.

Гьихьтин себебралди ихьтин дуьшуьшар арадал къвезва?

— чIурузвай (къайдадик квачир) ва сертифицировать тавунвай газдин алатар ишлемишун;

— алатар ишлемишунин ва и кардин хатасузвилин къайдаяр чIурун;

— къадагъа тир ремонтдин кIвалахар жува-жуваз кьиле тухун.

И жигьетдай къайдаяр чIу­руни пис нетижайрал гъун мумкин я: зегьерламиш хьунал, хъиткьинунал ва я цIай кьунал.

Чешмеди агьалийриз чпин уьмуьр хатасузвилик кутун тавуниз, газдин алатар иш­лемишунин къайдаяр вилив хуьниз, технический рекьяй герек серенжемар вахтунда кьиле тухуниз ва, алатар чIур хьунин сифте лишанар пайда хьанмазди, пешекарар хабардар авуниз эвер гузва. Авариядин гьалар арадал атайла ва я газдин ни акъатайла, 104-нумрадиз зенг авун герек я.

Хатасузвал таъминарун патал фикир гана кIанзавай бязи делилар:

Ахтармиша ва гелкъуьгъ

Гьар йисуз ахтармишун патал газдин къуллугъдин векилриз эвера. Ремонтдин кIвалахар жува ийимир.

Котел ва я колонка кутадалди вилик гьава чIугвазвани, чIугвазвачни ахтармиша (вентиляциядин сеткадал чарчин кIус твах).

Жуфтвилел гуьзчивал ая

Запундин кфадалди галкIурнавай чкай­рай газ акъатзавани, акъатзавачни вацра са сеферда ахтармиша. Куркурар пайда жезватIа, газ ахъайзава.

Газ акъатзавай чкаяр садрани цIун куьмекдалди жагъуриз алахъмир.

Алатар дуьздаказ ишлемиша

Плита дуьздаказ кардик кутур: сифте горелкадал цIай твах, ахпа газ ачуха.

ЦIай экуь-вили рангунинди хьана кIан­­­­­­да. Эгер ам хъипиди ва я гьис галайди­ хьайитIа, газ агала ва устIардиз эвера.

Колонкади ва я котелди кIвалахдайла, гьава атун таъминара (дакIардин са вил ахъая).

Дараматда плитадин куьмекдалди чими ийимир ва я адал шейэр кьурурмир.

ЦIай кваз кIвалахзавай алатар гуьзчивал алачиз тамир.

Гъавурда авачир ксар газдин алатрив агудмир.

Газдин цIай квай алат авай кIвале ксумир.

Газдин алат элкъуьрна маса затIа­ралди агалдайвал ийимир.

Эгер дараматда газдин ни аватIа, гьасятда серенжемар кьабулна кIанда. Ихьтин дуьшуьшра экв, электричестводин алатар кутуна (хкудна)­ виже къведач, цIай ишлемишна кIан­дач.

Сифте нубатда газ агала, дакIарар ахъая, инсанар дараматдай акъуд ва 104 нумрадиз (газдин аварийный къуллугъдиз) зенг ая!

Гьазурайди – Муса  Агьмедов