И йикъара чав мусибатдин хабар агакьна. СВО кьиле физвай мулкарин рекье хьайи авариядин нетижада Дагъустандин виридалайни жегьил ва кар алакьдай командиррикай сад, гвардиядин полковник Эрик Селимов кечмиш хьана.

Ам 1987-йисуз Дербент райондин агьалийрин социальный ихтиярар хуьдай управленида кIвалахай Анверан хизанда дидедиз хьана. Анверахъ авай пуд хцини военный рехъ хкяна. Эдик полициядин капитан я, Мелик — прапорщик. Эрикахъ галаз кьве стхадини махсус серенжемда иштиракзава.

Белиж хуьруьнви Эрик Селимов Россия­дин Армиядин халисан офицер тир. 2-нумрадин мектеб куьтягьай кьегьалдин уьмуьр­дин­ни къуллугъдин рехъ гвардиядин 136-кьилдин гвардиядин мотострелковый бри­гададин командирдин везифаяр тамамардайла, кьатI хьана.

Полковник уьмуьрдин эхиримжи рекье­ твазвай мярекатдал РД-дин Гьукуматдин Председателдин заместитель Р. Жафаров, 58-армиядин командирдин везифаяр тамамарзавай И. Гвозденко, дивизиядин поли­тикадин рекьяй командирдин заместитель З. Гьасанов, рагьметлудахъ галаз къуллу­гъай офицерар, РД-дин бязи районрин администрацийрин кьилер, военный отряд, ас­керар, Белиж поселокдин хуьруьн агьали­яр, жемиятдин тешкилатрин векилар ва масабур атанвай.

Гвардиядин полковникдин чиндин дережадиз акъатун патал Селимова рикI эцигна Москвадин высший военный командирар гьазурдай училищеда, ахпа Москвадин­ Фрунзедин тIварцIихъ галай Академияда­ кIел­на. Военный рехъ ада взводдин коман­дирдилай гатIунна. ЧIехи дережайрив агакь­­­далди, ада Самарадин, Белгороддин гьар жуьре военный частара, Сирияда кьиле фейи вакъиайра, Крым миллетчийрикай­ азадзавай махсус серенжемда, СВО гатIу­най йикъалай Донбассда вини дережадин пешекар, кар алакьдай кьегьал командир яз къуллугъна. Къуллугъдин везифаяр тамамардайла къалурай викIегьвилерай ва къагьриманвиляй ам «Жуьрэтлувиляй»­ пуд ордендиз, Суворован ва Жукован тIва­ра­рихъ галай медалриз, «Дагъустан Рес­пуб­ликадин вилик лайихлувилерай» ордендиз ва хейлин маса шабагьриз лайихлу хьана.

Жегьил яшда аваз военный рекьяй еке дережадиз хкаж хьуни высший военный руководстводи адахъ авур чIехи ихтибарвал къалурнава. Вичихъ авур ихтибарвал, гьихьтин четинвилер гьалтнатIани, ада аскеррин сагъламвал хуьз, тамамвилелди кьилиз акъудна.

Ясдин митингдал Р. Жафарова РД-дин Кьил Сергей Меликован тIварцIихъай Эрик Селимован диде Умуят Магьмудовнадиз ва буба Анвер Гьажикъурбановичаз, рагьметлудан уьмуьрдин юлдашдиз, дериндай хажалат чIугунивди, башсагълугъвал гана.

— Чна квехъ галаз гъам чIугвазва. И четин вахтунда квез Аллагьди сабур ва къуватар гурай! Республикади куь хизандиз вири патарихъай куьмекар гуда.

Эрик Селимов телеф хьун — им Дагъус­тан, Яракьлу къуватар ва вири уьлкве патал са куьнивни ахцIур тежер магьрумвал я. Кьегьалди уьмуьрдин эхирдалди присягадиз, военный буржидиз ва Ватандиз вафалувал хвена. Ихьтин офицерар Дагъус­тандин дамах я! Адан кьегьалвилер чи рикIера эбеди яз амукьда ва гележегда Ватан ­хуьдай несилриз ам чешне жеда, — лагьана Р. Жафарова.

Мярекатдал рахай И. Гвоз­ден­ко­ди Э. Селимов, рикIе мурадар амаз, вахтсуз рагьметдиз финихъ галаз алакъалу яз, адан багърийриз башсагълугъвал гана. Вичин рахунра ада пешекар офицердин гележег фа­гьумдай зигьин, гьахъвал, намуслувал, гафунал кIевивал, гьакIни командирдин вини дережадин эдеблувални дикъетлувал къейдна. Ам жуьрэтлувиляй, чан эцигна къуллугъ авунай виридаз чешне тир. ГьакIни ам Ватан хуьниз вири уьмуьр бахш­навай инсан тир. Адан кардиз вафалувал, офицервилин намусдин, инсанвилин ерияр гьамишалугъ чи рикIера амукьда.

Дербент райондин кьил Эльман Аллагьвердиева райондин вири агьалийри офицердихъ дериндай яс чIугвазвайдакай лагьана.

Гвардиядин полковникдин женгинин юлдашри Р. Жафаровавай Эрик Селимоваз Россиядин Игит лагьай тIвар гун патахъай­ С. Меликова В. Путиназ тавакъу кхьин тIа­лабна.

Рагьметдиз фенвай гвардиядин полковникдин экуь къамат эбеди рикIера хуьнин лишан яз аскеррин дестеди автоматрай салют гана.

Къагьриман  Ибрагьимов