Махсус серенжемдикай

РФ-дин оборонадин министерстводи малумарай делилралди, уьлкведин кьушунри «Орешникдивди» бар­батI авур Львовдин заводда F-16 ва МиГ-29 истребителар ремонт ийизвай. Заводда ВСУ-ди Россиядин яшайишдин объектрал гьужумзавай дронарни арадал гъизвай. «Пилот галачиз лув гудай аппаратар арадал гъизвай ва гьазур хьанвай суьрсет хуьзвай складар, гьакIни заводдин инфраструктура терг хьана», — лагьанва министерстводин малуматда.

ТIвар кьунвай министерстводи 12-январдиз малумарай делилралди, кьушунрин «Центр» дестеди ДНР-дин Белицкое, Водянское, Гришина ва Днепропетровск­дин областдин Гавриловка ва Новоподгородное хуьрерин мулкара ВСУ-дин гьужумдин кьве полкуниз, нац­гвардиядин вад бригададиз ягъунар кьуна. И мулкара Украинадин яракьлу дестейрикай са йикъан къене 400-далай гзаф ксар хкатна.

Кьушунрин «Днепр» дестеди Запорожьедин област­дин Новобойковское хуьр азадна. ГьакIни Запорожьедин областдин Кирово, Орехов, Юрковка ва Херсондин областдин Садовое хуьрерин мулкара нацгвардиядин бригадайриз ягъунар кьуна.

Махсус серенжем кьиле тухунив эгечIайдалай инихъ Россиядин Яракьлу Къуватри Украинадин 670 самолет ва 283  вертолет, зенитный ракетайрин 645 комплекс, пилот галачиз лув гудай 108458 аппарат, 27074 танк ва дяведин маса машинар, РСЗО-дин 1640 машин, артиллериядин ва маса 32517 яракь, военный махсус 51537 автомашин тергна.

Гренландиядал рикIивай гьавалат хьанва

США-дин сиясатчи Р. Файна Гренландия США-дик кутунин гьакъиндай конгрессдиз законопроект малумарнава. «Къе конгрессмен Файна (Флоридадин патай) Гренландия гужуналди уьлкведик кутунин ва адаз штатдин дережа гунин гьакъиндай законопроект тек­лифна», — лагьанва абуру чукIурнавай малуматда. Идакай «РИА Новости» чешмеди хабар гузва.

Америкавийри гьисабзавайвал, Вашингтондиз и мулкарин игьтияж Арктикада къецепатай жедай къурхулувал себеб яз уьлкведин итижар хуьн патал герек я. США-дин терефди гуя и мулкара Россиядини Китайди чпин мумкинвилер гегьеншарзаваз гьисабзава.

Эгер кьабулайтIа, ихтилат физвай къанунди Д. Трампаз остров гужуналди ва я маса къачун патал герек тир гьар гьихьтин хьайитIани серенжемар кьабулдай мумкинвал гуда.

Къейд ийин, Гренландия Даниядин королевстводик акатзава. 1953-йисалди ам Даниядин колония тир, амма 2009-йисуз аниз вичивай вич идара ийиз жедай ва къенепатан сиясат вичи тайинардай мумкинвал авай автономиядин дережа гана.

Милли хатасузвал патал стратегиядин важиблувал аваз гьисабуналди, Д. Трампа Гренландия Сад хьанвай Штатрик экечIун герек тирдакай идалай виликни са шумудра лагьанай.

Гьамишан лагълагъ

Къалмакъалдал эхир эцигун патал гьазурнавай, США-динни Россиядин арада веревирдер ийизвай документдиз талукь яз Украинадин терефди чпин фикир тайинарнава. Идан гьакъиндай В. Зеленскийди телеграм-каналда малумарна.

Адан гафаралди, эхиримжи варцара дипломатвилин жигьетдай Вашингтондини Киевди гзаф алахъунар авуна. Гуя къалмакъал акъвазарунихъ ялзавач лугьуз, Зеленскийди нубатдин сеферда Москвадик тахсир кутуна. Вичин фикир ада Россиядиз РагъакIидай пата аксивилер давамарун герек тирди къейднавай гафар кхьиналди куьтягьна.

Вашингтондин тIем Ирандик акакьдач

Иранда арадал атанвай чалпачух гьалар бязибуру­ Трампа геополитикадин жигьетдай авунвай хъсан гьужум яз гьисабзава: Венесуэладин регьбер Мадуро кьуна, гила Гренландия вахчуникай рахазва, мадни лугьузва хьи, «Ирандиз азадвал хуьн патал куьмек гуз гьазур я». Ихьтин фикир «РИА Новости» чешмеда журналист П. Акопова раижнава.

Хиве кьазвайвал, Иранда гьам экономикадин, гьамни идара авунин къурулушдин жигьетрай гьялна кIан­завай къенепатан месэлаяр авачиз туш. Пешекардин фикирдалди, США-дивай Иран сарарик кутаз жедач.

«Лезги газет»