2025-йисуз Дагъустанда «Хизан» милли проектдин «ЧIехи несил» проектдин сергьятра аваз яшлу 8000-далай виниз ксариз куьмекар гана. ЧIехи несилдин уьмуьрдин ери хкажиз ва абуруз куьмекар гунихъ элкъуьрнавай проектдин сергьятра аваз агакьардай къуллугърин тайин къайда тестикьарнава. Аник медицинадин идарайрин сиягь, кьилди са касдихъ галаз ракъурдай (индивидуальный сопровождение) жуьре ва яргъал тир хуьрериз мобильный бригадаяр рекье тунин план ква.
ИкI, яшар 65-далай алатнавай 8 183 кас лазим куьмек патал медицинадин идарайриз агакьарна. Жувахъ гелкъвез тежезвай яшлу ксарин яшайишдин къуллугъар пулсуздаказ кьилиз акъудна. Уьмуьр активнидаказ кьиле тухун яргъи авунихъ ва яшлу ксарин мумкинвилер уьмуьрдиз кечирмишунихъ элкъуьрнавай программади алатай йисуз 160 агъзурдалай виниз инсанар сад авуна.
Дагъустандин зегьметдин ва яшайиш вилик тухунин министерстводи шегьерра хьиз, гьакI яргъал тир хуьрерани куьмек регьятдаказ агакьарун патал кIвалах тухун давамарзава.
«Лезги газет»
