ЦIийи йисан каникулриз бес кьадарда ял ягъай агьалияр кIвалахрив эхгечIна. 13-январдиз Россияда печатдин югъ къейд авуна. Идахъ галаз алакъалу яз Дагъустан Республикадин Кьил Сергей Меликова и хиле зегьмет чIугвазвай журналистар, издателар, типографийрин къуллугъчияр, печатдихъ галаз алакъалу маса пешекарар ва ветеранар тебрикна.
Гьа гьисабдай яз ада лагьана: «Россиядин Президент Владимир Путина са шумуд сеферда къейд авурвал, журналистикадин кьилин везифа жемиятдиз къуллугъ авун, халкьарин арада ихтибар, дуствал мягькемарун, акьалтзавай несилдик ватанпересвилин руьгь кутун я. Инанмиш я, Дагъустандин журналистри гьа и везифаяр лайихлувилелди кьилиз акъудзава ва абур гьамиша вилик жергейрани ава…»
Дагъустанвийриз, важиблу и хиле зегьмет чIугвазвайбуруз, печатдин югъ РД-дин Халкьдин Собранидин Председатель Заур Аскендерова ва РД-дин Гьукуматдин Председатель Абдулмуслим Абдулмуслимовани рикIин сидкьидай тебрикна.
14-январдиз республикадин газетринни журналрин комплексда Россиядин печатдин йикъаз талукьарнавай шад мярекат кьиле фена. Ана РД-дин Гьукуматдин Председателдин заместитель Заур Эминова, РД-дин Кьилин ва Гьукуматдин Администрациядин заместитель Рашид Акавова, РД-дин Халкьдин Собранидин депутатри, министрри, печатдин хилен ветеранри, жемиятдин тешкилатчийрин векилри, газетрин, журналрин редакцийрин, издательствойрин, типографийрин къуллугъчийри иштиракна.
КIватI хьанвайбуруз суварин югъ РФ-дин журналистрин союздин Дагъустандин отделенидин председатель, «Лезги газетдин» кьилин редактор Мегьамед Ибрагьимова мубаракна ва гьа са вахтунда союзди, журналистрин коллективри 2025-йисуз авур лайихлу крар рикIел хкана.
— Гьуьрметлу дустар! Дагъустан бажарагълу журналистралди фадлай машгьур я. Республикада 14 чIалал жемиятдинни сиясатдин газетар ва журналар акъатзава. Телеканалар, радио, сетрин СМИ-яр кардик ква. Шад жедай кар ам я хьи, цIи Дагъларин уьлкведин печатдин сад лагьай издание «Дагъустан» газет акъатайдалай инихъ 120 йис тамам жезва. Амни 1906-йисан 27-февралдиз кIелдайбурув агакьнай. Къе республикадин журналистри алатай несилрин лап хъсан крар давамарзава. Абурукай бязибур къе жуьреба-жуьре шабагьралди къейд ийида.
Са-кьве гаф чи отделенидикайни. Алатай йисуз Россиядин журналистрин союздиз республикадай 400 кас кьабулна. Разивалдай кар ам я хьи, абурун чIехи пай жегьилар я. Абуру чпин изданийра викIегьдиз кIвалахзава, республика ва уьлкве патал важиблу месэлаяр къарагъарзава, баркаллу инсанрикай кхьизва. Дагъустандин журналистрин отделение уьлкведин лап хъсан къад отделенидик акатзава.
Журналистрин Дагъустандин отделениди алатай йисуз Вирироссиядин «Вири Россия — 2025» форумда иштиракна. Махачкъаладин администрациядин векилрихъ галаз чи меркездихъ туризмдин рекьяй авай мумкинвилер къалурзавай стенд ачухна.
Алатай йисуз отделениди важиблу са шумуд мярекат тухвана. Кьилди кьуртIа, республикадин машгьур политикар ва журналистар тир Ильман Алипулатов ва Загьир Арухов рикIел хкунин мураддалди республикадин конкурсар тешкилна. Избербашдин детдомдин аялар патал мерягьматлувилин серенжем тухвана, Редукторный поселокда «Журналистрин жуьрэтлувал ва баркаллувал» аллея ачухна, Фашистрин Германиядал Гъалибвал къачурдалай инихъ 80 йис тамам хьуниз талукьарнавай ва маса мярекатар кьиле тухвана.
Гьелбетда, ахьтин зурба мярекатар кIвалахдин юлдашар, меценатар, дустар галачиз тешкилиз жезвайди туш. Къенин мярекатдикай менфят къачуна заз РФ-дин Госдумадин депутат Жамалдин Гьасановаз, РД-дин информациядин ва печатдин Агентстводин регьбердин меслятчи Мурад Мегьамедкеримоваз, РД-дин Халкьдин Собранидин депутатар тир Имам Яралиеваз, Марат Алияроваз, Шамил Омароваз ва гьакI чи проектар кьилиз акъудуник чпин зегьметдин пай кутазвай кIвалахдин юлдашриз сагърай лугьуз кIанзава.
Республикадин Кьилин, Гьукуматдин Председателдин тIварунихъай яратмишунал машгъул коллективриз печатдин югъ Заур Эминова тебрикна ва ада кIвалахда тафаватлу хьанвай журналистрив Россиядин журналистрин союздин ва республикадин шабагьар вахкана. И шад ва разивилин везифа мадни мярекатдин иштиракчияр Мегьамед Ибрагьимова, Жамалдин Гьасанован куьмекчи Наби Юсупова, РД-дин Кьилин ва Гьукуматдин Администрациядин регьбердин заместитель Рашид Акавова, РД-дин информациядин ва печатдин Агентстводин регьбер Арсен Юсупова, республикадин журналистрин отделенидин председателдин заместитель Байрам Абдуллаева ва масабуру кьилиз акъудна.
Шад жедай кар ам я хьи, шабагьриз лайихлу хьайибурун арада чи ватанэгьлиярни, «Лезги газетдин» редакциядин къуллугъчиярни ава. ИкI, Россиядин журналистрин союздин «Лайихлувилерай» медалдиз Мурад Мегьамедкеримов, «Журналистикадин ветеран» медалдиз Шихмурад Шихмурадов, РФ-дин Госдумадин депутатдин патай дипломдиз ва пулдин пишкешдиз Жасмина Саидова, Россиядин журналистрин союздин грамотадиз Шерихан Фейзуллаева лайихлу хьана. Чна виридаз шабагьар мубаракзава ва кIвалахда мадни хъсан агалкьунар хьун алхишзава.
Абад Азадов
