Имам Музамудинович Яралиев — Дагъустандин жемиятдинни сиясатдин машгьур деятель, государстводин II классдин советник (генерал-лейтенант), Дагъустандин Халкьдин Собранидин депутат, тIвар-ван авай меценат.
И.М. Яралиев 1956-йисан 2-январдиз СтIал Сулейманан райондин Вини СтIалдал дидедиз хьана. Кьасумхуьруьн юкьван мектеб 1974-йисуз къизилдин медалдалди акьалтIарна, совхозда фялевиле кIвалахна. 1975-йисуз ам Дагъустандин госуниверситетдик экечIна ва 1980-йисуз яру дипломдалди (Ленинан стипендиат) юридический факультет куьтягьна. 1981-йисалай прокуратурада жуьреба-жуьре къуллугърал, 1986-1992-йисара Дербент райондин прокурорвиле, 1992-1995-йисара республикадин прокурордин сад лагьай заместителвиле кIвалахна. РД-дин Госсоветдин членвиле хкяна.
1995-йисан 12-октябрдиз Россиядин Генеральный прокурордин приказдалди И.М. Яралиев Дагъустан Республикадин прокурорвиле тестикьарна. Ада республикадин законар Конституциядихъ галаз кьадай гьалдиз гъуник ва законар хуьдай органра реформаяр тухуник чIехи пай кутуна. Ам РФ-дин прокуратурадин гьуьрметлу къуллугъчи, Россиядин лайихлу юрист я. И.М. Яралиеваз Гьуьрметдин орден, вичин тIвар кхьенвай яракь, А.Ф. Конидин тIварцIихъ галай къизилдин медаль ганва.
И.М. Яралиева СтIал Сулейманан райондин, Дербент шегьердин регьбервиле кIвалахна. Алай вахтунда РД-дин Халкьдин Собранидин депутат, меценат яз Дагъустан вилик финик лайихлу пай кутазва.
Алукьзавай йисан 2-январь Имам Музамудинович Яралиеван 70 йисан юбилейдин югъ я. Имам Музамудиновича инсанриз гьамиша гузвай куьмекдин, вири мергьяматлувилерин къадир авай «Лезги газетдин» редакциядин коллективди халкьдин вафалу хциз хайи югъ рикIин сидкьидай мубаракзава. Чаз адахъ гележегдани мягькем сагъламвал, хизандин бахтлувал, уьмуьрда чIехи гъалибвилер хьана кIанзава.
«Лезги газетдин» редакциядин коллектив
