Интервью

Жегьилар виридалайни активный ва кар алакьдай ксар яз гьисабзава. Абурухъ зурба гьевес, зиреквал, цIийи гьар са кардиз итиж ийидай ерияр ава. Эгер вири и лайихлувилер дуьз рекье тваз алакьайтIа, жегьилрикай чпизни, уьлкведизни, жемятдизни анжах хийир жеда. Малум тирвал, гьар са хуьруьхъ адан тIвар виниз акъудзавай рухваяр, рушар ава. Къадим Ахцегьрин баркаван чил лагьайтIа, рес­публикада гзаф рекьерай чеб сифтебур хьайи зурба бажарагъдалди тафаватлу ксарин макан я.

Кьисметди инсан акъуд тийидай чка жедач. КIелиз, гьихьтин къуллугъдал кIвалахиз хьайитIани, дуьз инсанди вич алай чка гуьрчегарда, жемят патал хийирдин кIвалахар ийи­да, патарив гвайбуруз вичикай хъсан фикирар тада. Гьа ихьтинбурукай сад «Сад тир Россия» партиядин патай Махачкъала шегьердин Собранидин депутат Агьмедов Атлухан Мухтарович я.

Ам 1987-йисуз Махачкъалада дидедиз­ хьана. Адан ери-бине Ахцегь райондин Луткунрин хуьряй я. 2004-йисуз школа куьтягьайдалай кьулухъ ам ДГУ-дин экономикадин факультетдик экечIна. Гьеле кIелдай йисара адан рикI жемятдин крарал алай. Вуз агалкьунралди куьтягьай жегьил гьа и университетда тарсар гуз эгечIна. И кIва­лахдихъ галаз санал 2017-йисуз адакай Махачкъалада «Союз» тIвар алай эцигунар­дай фирмадин генеральный директор хьана. Вичин къаюмвилик 50 офисдин къуллугъчи  ва 300 касни эцигунардай объектрал кIвалахзавай фялеяр кваз ада вич кар алакьдай, вичин кIвалах чидай, хъсан тешкилатчи яз къалурна.

Регьимлу рикI авай Атлухана  агьалийриз вичелай алакьдай куьмекарни ийизва. Вири и крар себеб яз ам гьукуматдин патай гьар жуьре шабагьриз лайихлу хьана.

Чаз шад хабар хьайивал, Махачкъала  шегьердин собранидиз депутатвиле  Луткунрин пуд агьали хкянава. И вакъиадихъ чи район патал кьетIен метлеб ава.

И мукьвара «Союз» компанийрин дестедин генеральный директор, вири крара хуьруьнэгьлийрин тереф хуьзвай ва гзаф кьадар хъсан крар кьилиз акъудзавай Атлухан Агьмедов хуьруьз хтай вахтунда, чун адахъ галаз гуьруьшмиш хьана.

– Атлухан Мухтарович, луткунвияр пуд кас санал шегьеррин собранийрин  депутатар хьун тарихда гьич тахьай хьтин вакъиа я.

— Дугъриданни, им аламат жедай кар хьанва. Кьвед лагьай депутат Султанбегов Фазир женгинин махсус серенжемдин иштиракчи я. Пуд лагьайди активный общест­венник, «Сад тир Россия» партиядин патай Каспийск шегьердин собранидин депутат Алимегьамед Юсуфов я. Им шад жедай ва муькуь пата­хъай­ гзаф жавабдар  кIвалах я. Зун кIевелай а кардихъ инанмиш я хьи, чун хайи хуьруьн ва райондин абадвал патал кIва­лахиз алахъда.

– Куьне сифте нубатда  кар алай гьи месэлаяр гьялдайвал я.

— Заз инсанрин уьмуьрдиз хъсан пата­хъай таъсир ийиз  ва чи республика вилик тухуник жуван алахъунрин лайихлу пай кутаз кIанзава. И кардиз  инсанрихъ галаз гзаф йисара кIвалахуни, чкайрал абурун тIал алай месэлаяр чир хьуни таъсирна. Идалайни гъейри, зун а кардин гъавурда ава хьи, вири месэлаяр гьялун, хъсан къанунар акъудун патал гьукумдин органрихъ галаз сих алакъа­яр хьун чарасуз я. Мисал яз, гьар сеферда къати марф къвайила Махачкъала шегьер це саки батмиш жезва. И кардин себебни эхиримжи вахтара талукь документар авачиз, къайдасуздаказ эцигнавай яшайишдин гзаф кьадар кIвалер я. Виликдай абурун кьадар 470 тиртIа, алай вахтунда ихтиярсуз эцигнавай кIвалерин кьадар 970 хьанва. ГьакIни Дагъус­тан патал кьвед лагьай еке месэла — рекьера улакьрин гьерекат гуьзчивилик кутун, пробкаяр арадай акъудун я. Ихьтин ва са жерге маса месэлаяр гьялунив эгечIун фикирдик ква..

– Атлухан Мухтарович, депутатдивай квелди инсандиз куьмек гуз жеда?

— Лугьун лазим я хьи, Дагъустандин Халкьдин Собрание — им законодательный орган я. Ина гьар са депутатдихъ са жерге векилвилер ава. Месела, депутатдиз къанундин рекьяй теклифар гваз экъечIна рахадай мумкинвал ава. Яни, чавай агьалийрин уьмуьрдин дережа хкажунихъ рекье тунвай гьар жуьредин къанунрин проектар гьялиз ва вилик эцигиз жеда. Им, сифте нубатда, бизнесдин тереф ва я къуллугъчийрин ихтиярар хуьниз, яшайишдин хел хъсанаруниз талукь я. Гьам федеральный ва гьамни республикадин гос­программайра иштиракун патал талукь тир материалар туькIуьрна чав агакьарна кIанда.

– Чпихъ активный гражданвилин сенгер авай жегьилри ихьтин суал гузва: депутат  хьун патал вуч авуна кIанда?

— Депутат хьун патал жемиятдин гъвечIи крарилай эгечIна кIанда: чарасуз яз волонтервилин гьерекатда, студентрин гьар жуьре­ советра, жегьилрин тешкилатра иштира­кун герек я. Гьа и жуьреда жегьил инсандихъ­ башчивилин ерияр арадал къвезва, инсанрихъ галаз дуьзгуьн алакъаяр хуьнин тежри^­ба пайда жезва, ам обществода арадал къвезвай дегишвилерин гъавурда гьатзава. Чи жегьил депутат­риз за кьвед лагьай меслят гузва: законодательст­во дериндай чира­. Обществодин вилик намуслу хьун чарасуз я.

Жегьил ятIани, Атлухан Агьмедов везифайрив эгечIзавай тегьердалди, низамдалди чIехи инсанрив эгечIзавай рафтарвилелди тафаватлу я, ада халкьдин ва депутатрин арада лайихлу гьуьрмет къазанмишнава. ИкI тирвиляй ам собранидин архитектурадин, эцигунрин ва чилин алакъайрин рекьяй комитетдин председателвиле хкянава.

Чаз чидайвал, агъсакъалар чпиз вири вахтара гьуьрметзавай, жемятдин важиб­лу­ гьар са кардин патахъай чпин камаллу гаф лугьузвай ксар я. Ингье, хуьруьн агъсакъалри А. Агьмедо­ван гьа­къиндай вуч лугьузватIа: «Гьеле гъвечIи чIа­валай Атлухан, кIвалах агалкьунралди­ кьилиз акъудуналди, тешкилатчивилин ерий­рал­ди тафаватлу жезвай.  Ам инсанриз вичелай алакьдай куьмек гун патал алахъдай. Гилани гьакI я. Адавай жуьреба-жуьре месэлайрай куьмек тIалабзава. Атлухана абурун умудар квахьдайвал ийизвач. Идахъ галаз сад хьиз, ада общественный крарани активвал къалурзава».

Атлухан Агьмедов жегьил чIехи хизандин кьилни я. Ада вичин уьмуьрдин юлдашдихъ галаз пуд аялдиз  тербия гузва. Саламат хьурай!

Лумуна Агьмедова