Зулун магьсулар цунин кампаниядин сергьятра аваз Россельхозцентрадин лабораторияди тумунин 22,1 агъзур тонн хаммал (материал) ахтармишна. Нетижада 99 процентдиз барабар техил ерилуди яз гьисабна ва ам цадай ихтияр гана, хабар гузва идаради. Мисал яз, ахтармишунар тухвайдалай кьулухъ филиалдин пешекарри 32 агъзур гектардилай гзаф майданра цанвай тумар хъсан гьалда авайди къейдна.
«Чи вилик квай асул месэла хуьруьн майишатдин суьрсет гьасилзавайбуруз сифтени-сифте ахтармишнавай, чпин ерилувал документралди къейднавай тумар ишлемишиз ва цазвай техилдин еридиз кьетIен фикир гуз чируникай ибарат я, вучиз лагьайтIа, нетижада Дагъустанди 2026-йисуз техилдин гьихьтин бегьер кIватI хъийидатIа гьа идалай аслу я», — лугьузва «Россельхозцентр» ФГБУ-дин РД-да авай филиалдин регьбер Жанна Къазанбиевади.
Къейд ийин, тум патал ишлемишзавай техил ахтармишдайла, адан михьивал, лабораторияда абур экъечIзавай тегьер (кьадар), экъечIунин энергия, цIир хкаж хьунин йигинвал, къуват, дурум гунин мумкинвал, ламувал, заланвал, зиянкар гьашаратар ва я азарар квани, квачни кваз кьазва.
Ж. Саидова
