Медетхан Эмируллаевич Гьамдулаев 1964-йисуз Дербент райондин Нуьгди хуьре дидедиз хьана. Бинеяр Кьурагь райондин КIимихуьряй тир адан дах Эмирулла Минетуллаевича вичин зегьметдин вири уьмуьрда  Нуьгдидин юкьван мектебда кIвалахна — сифте географиядин муаллимвиле, ахпа, пенсиядиз фидалди, мектебдин директорвиле. 

— Заз гъвечIи чIавалай дах вичин пешедив гьикьван кIанивилелди ва гьуьрметдивди эгечIзаватIа акуна, — рикIел хкизва офицер Медетхана. — Ада акьалтзавай несилдиз ашкъидалди гузвай чирвилери ва тербияди закни чирвилериз къимет гуз ва жуван чирвилер тамамвилихъ агакьариз гьевес кутуна.  Зун ватанперес яз чIехи авуна бинеяр РичIа хуьряй тир зи дидедин зегьметдихъни еке метлеб ава. Ада гьамиша чаз халкьдин меденият, адетар кIанардай…

Мектеб акьалтIарай жаван 1980-йисуз­ Дагъустандин механикадин техникумдиз­ гьахьзава. Агалкьунралди техникум акьал­тIарай 1984-йисуз адаз Советрин Армиядин жергейриз эверна. Армиядай хтайла, Каспийск шегьердин СПТУ-да механиквиле, гуьгъуьнлай гражданвилин оборонадин производстводай чирвилер гудай курсара устIарвиле кIвалахна.

СССР чкIай 1991-йисуз ам хуьруьз хтана, К. Мамедбегован тIварцIихъ галай совхозда рабочийвиле кIвалахал акъвазна.

Уьлкве чкIайдалай кьулухъ арадал атай гьалар гзафбур патал бегьем имтигьандиз элкъвена. Хейлинбур хизан хуьдай кIвалах амачиз амукьна…

Вири хьиз, Медетханни уьл­кведа кьиле фейи тамам къайдасузвилерин шагьид хьана.

— Зи кьве гъве­чIи стхади — Минетуллагьани Ильяса — сергьятар хуьдай кьушунра офицерар яз къуллугъзавай, — лугьузва М. Гьамдулаева, — иниз килигна, за Ватандинни хизандин вилик жуван эдебдин буржи гьиссзавай.

1994-йисуз запасда авай старший сержант М. Гьамдулаева сергья­тар хуьдай кьушунрихъ галаз икьрар ку­тIунна. Къуллугъ авун давамарна.

1996-йисуз Дербентдин пог­ранотряддин Командованиди ам офицерар­ гьазурдай курсариз ракъурна. Са йисалай курсар агалкьунралди акьалтIарай адаз младший лейтенантдин чин гана. ИкI военный къуллугъда адан пешекарвилин рехъ ачух хьана.

— ЦIийи шартIара, — рикIел хкизва  Медетхан Гьам­дулаева, — гзаф четинвилер гьалтна:  яшамиш­ жедай ва техника хуьдай ангарар авачир, военный къуллугъ ийизвайбурун агьваллувилин гьалар пара четинзавай. Гзаф офицерарни прапорщикар арза кхьена погранкъуллугъдай экъечIна.

Гьахьтин чкадал зунни атанвай. Амма жува-жуваз ганвай «Ватанни хизан хуьда» лагьай гафуни зав гъалатI ахъайиз тунач. За къуллугъ авун давамарна.

ИкI ада 11 йисуз  Россиядин ФСБ-дин Дагъустан Республикада ва 9 йисуз Россиядин ФСБ-дин Чечен Республикада авай Пог­рануправленийра ва Грузияда къуллугъна. И йисара ада адетдин сержантдин къуллугъдилай гатIунна гьар жуьре подразделенийрин командир яз гьукуматдин хатасузвал хуьз жуьреба-жуьре махсус серенжемра иштиракна.

Къуллугъдивай къерех тахьана, Ивановодин, Москвадин финансринни промышленностдин университетра (государственное муниципальное управление) кIел­на.

2014-йисуз подполковникдин чинда аваз ам запасдиз ракъурна. Пуд йисуз «Дербентсервис» МУП-да директордин заместителдин везифаяр тамамарна.

Адан рахунрай малум хьайивал, а вахтунда ада вичин военный къуллугъ куьтягь хьанвайдай гьисабзавай. Амма уьмуьрди рикIел алачир вакъиайрин иштиракчи ийида.

2022-йисан сентябрдин вацра мобилизация малумарайла, адан уьмуьрни дегиш жезва.

— 22-сентябрдиз зун Дербент шегьердин военкоматдиз фена, — рикIел хкизва ада. — Ина заз, зун хьиз, чпин буржи тамамариз атанвай гзаф инсанар акуна. Садбуруз мобилизацияди уьлкведиз къуллугъдай мумкинвал гана, муькуьбур патал ам хизанар, адетдин уьмуьр туна, залан пардиз элкъвена. Гьелбетда, зи багърийри зи кьисмет гьикI жедатIа ва мобилизацияди зи уьмуьр­диз гьикI таъсирдатIа, зи кьилел  вуч къведатIа лугьуз, фикирзавай.

26-октябрдиз Минетуллагь стхадилай хабар къвезва: «Зун мобилизоватнава ва нисинилай кьулухъ Чечен Рспубликадин 72-мотострелковый полкуниз ракъурзава». Ватандин абадвал хуьн патал чпин буржи тамамариз физвай вичин стхаяр, хтул Расим ва танишар акурла, ам вичи кьабулнавай къарардал генани мягькем хьана ва гуьгьуьллудаказ фидайди кьетIна.

Гуьгьуьллубурун десте кIватIиз кьве гьафте хьана. КIватI хьанвай 30 кас гуь­гьуьл­лубур Новочеркасск шегьердин пунк­туниз ракъурна. Медетхан гуьгьуьллубурун пуд лагьай кьилдин «Барс» тIвар ганвай дестедик акатна.

И дестедик кваз ам ноябрдин юкьварилай Запорожьедин областда женгинин везифаяр тамамариз гатIунна.

— Махсус серенжемда къуллугъ авунин шартIар акьван регьятбур туширтIани, — лугьузва ада, — чак чи хизанрихъ галаз авай алакъади руьгь кутазвай. Мумкинвал хьайила, зенгер ийидай, бязи вахтара хизандихъ галаз видеодин зенгерни ийиз жезвай. Зун Новочеркасскда къуллугъдин командировкада авайла, зал кьил чIугваз чIехи руш Мадинани хтул Рашид атана. Хизандихъ галаз авай и гъвечIи легьзейри чаз къуват гузвай ва чна миллетчийрихъ галаз женг тухузвайди рикIел хкизвай.

Лайихлудаказ вичин вилик эцигнавай везифаяр тамамарунай, са рехнени квачиз къуллугъ авунай ва женгера къалурай кьегьалвилерайни жуьрэтлувиляй ам Россия­дин ФСБ-дин погранкъуллугъдин кье­тIен артуханвилин лишандин, «Донбасс­дин доб­роволец» лишандин, «Дирибашвиляй» 2-дережадин, «Махсус серенжемдин иштиракчи» медалрин сагьиб ва женгерин гьерекатрин ветеран я. ГьакIни Дагъустан Респуб­ликадин Кьилин патай ганвай рикIел хуьдай гъилин сятинин иеси я.

2023-йисан апрелдин вацра, икьрардин вахт куьтягь хьана, ам хуьруьз хтана. Секиндиз хизандихъ галаз уьмуьр давамарзава.

М. Гьамдулаев Президентдин «Время героев» программадин финалист я. Алай вахтунда ада СВО-дин иштиракчиярни ветеранар патал кардик кутунвай республикадин «Дагъларин гьунарлувал» программадин проектда иштиракзава.

Адан уьмуьрдин юлдаш Гьалимата­ гъуь­луьхъ галаз военный къуллугъда гьалтай вири четинвилерни шадвилер санал­ пайна. Абурухъ гуьзел кьве руш ава — Мадинани Лейла. Абуру чпин дидедизни ­бу­­бадиз вад хтул багъишнава: пуд гада — Рашид, Ибрагьим, Исмаил ва кьве иер руш — ­Алинани Лиана. Гьар са хтулди куь уьмуьр­диз анжах эквни шадвал гъурай, гьуьрметлу Гьамдулаевар. Дуьнья ислягь хьурай!

Къагьриман  Ибрагьимов