Меркезда Дагъустан Республикадин Жемиятдин палатадин советдин гъилевай йисан эхиримжи заседание кьиле фена. Анал палатадин векилри йисан вахтунда авур кIвалахдин нетижаяр кьуна, къазанмишай агалкьунриз дуьзгуьн къимет гана ва гьар са касди, экспертри, амадагри республикада гражданвилин обществодин институтар вилик тухунин умуми кIвалахдик кутур пай къейдна.
РД-дин Жемиятдин палатадин председатель Азизбег Черкесова кIватI хьанвайбур тебрикна, абуруз алукьзавай ЦIийи йис мубаракна ва йисди авур кIвалахдин къиметлувиликай, важиблувиликай лагьана.
Мярекатдин иштиракчийри РД-дин Жемиятдин палатадиз Россиядин Федерациядин ОП-дин «Жемиятдин вилик лайихлувилерай» медаль гун хушдиз къаршиламишна.
— И шабагьди чи палатадин гьар са членди пешекарвилелди, мукьуфдивди, республикадин ва уьлкведин итижар патал зегьмет чIугурдан гьакъиндай шагьидвалзава, — лагьана А. Черкесова. — 2025-йисуз чна общественный контролдин везифаяр пара хъсандиз кьиле тухвана, гуманитарный месэлаяр гьялна, уьлкведин маса регионрин жемиятдин палатайрин коллективрихъ галаз менфятлу алакъаяр тешкилна ва гьакIни федеральный проектар уьмуьрдиз кечирмишунин кардик пай кутуна. Ида къалурзава хьи, гражданвилин обществодин институт хьиз, палатади гъавурда аваз ва бегьерлувилелди кIвалахзава.
2025-йисуз РД-дин ОП-ди федеральный ва региондин майданда аваз хъсан крарик кьил кутуна, РФ-дин цIийи регионрихъ галаз ватанпересвилин ва гуманитарный проектар кьилиз акъудна, республикадин мулкуна жемиятдин контроль таъминарна.
Рахунрилай гуьгъуьниз республикадин илимдин ва культурадин тIвар-ван авай ксар тир З. Юзбеговаз, В. Загироваз, С. Исрафиловадиз, экспертар Р. Луговойдиз, Э. Эдельшиноваз, Х. Тилакаевадиз, Ф. Нурмегьамедовадиз РД-дин ОП-дин гьуьрметдин грамотаяр гана. ОП-дин аппаратдин регьбер Ислам Мегьамедовав «Жемиятдин вилик лайихлувилерай» медаль вахкана.
«РД-дин коррупциядиз акси комитет» МОО-дин активный членарни къейд авуна.
Мярекатдин эхирдай иштиракчийри важиблу маса месэлаярни веревирдна ва абур 2026-йисан кIвалахдин пландизни килигна.
Абад Азадов
