И мукьвара Каспийскда, Къ. Къурамегьамедован тIварунихъ галай энергетикадин колледждин спортдин дараматда, джиу-джитсудай Дагъустандин Кубок патал кьиле фейи акъажунра республикадин саки вири шегьеррайни бязи районрай тир спортсменри яшарин ва заланвилин са шумуд категориядай чпин устадвал къалурна. Хъсан нетижаяр къазанмишайбурун арада Махачкъала, Каспийск шегьеррин хьиз, Мегьарамдхуьруьн районрин ЦIийи Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин чемпион ва гзаф маса агалкьунрин сагьиб Эйнар Экберов ва адан гъилик устадвал хкажзавай жаван спортсменарни хьун иллаки шад жедай кар я.
Абурун агалкьунрикай газетда чна идалай виликни са шумудра муштулухар гайиди я, нубатдин сефердани и кар еке гьевесдивди кьилиз акъудзава. ГьикI хьи, санлай 6 спортсменди жуьреба-жуьре медалар къазанмишуналди ва тренерди 1-чка кьуналди, абурун команда 2-чкадиз лайихлу хьанва. ИкI, Эйнар Экберова 69-кг-дин заланвал авай спортсменрин арада 1-чка кьуна. 2011-2012-йисара дидедиз хьайи жаванрин арада Мамед Садикьов (62 кг) — 1, Ибрагьим Алиев (77 кг-дилай артух заланвал авайбурун арада) — 2 ва Ислам Байрамбегов (52 кг) 3-чкайриз лайихлу хьана. 2009-2010-йисара дидедиз хьайи жаванрин арада Гьажи Лачиновани (62 кг) Рамзан Хударова (56 кг) — 1 ва 2013-2014-йисара дидедиз хьайи жаванрин арада Ислам Айдунбегова 2-чкаяр кьуна.
Макъала гьазурзавайла, заз са кардикай мадни чир хьана. Амни акьалтзавай несилдин къайгъударвал чIугунихъ галаз алакъалу яз чи са жерге ватанэгьлийри кьилиз акъудзавай къени крариз талукьди я. ИкI, «Дуьньядин лезги спортсменар» тIвар алаз, Рамиз Агъасиева ва Эйнар Экберова мессенджерда арадал гъанвай дестедик республикада хьиз, Россиядин регионра, гьакI дуьньядин жуьреба-жуьре уьлквейра яшамиш жезвай 700-далай виниз чи ватанэгьлияр — машгьур спортсменар, тренерар, активистар, са гафуналди, жуван хайи халкьдихъ рикI кузвай ксар — ква. Кьилди къачуртIа, и сиягьдик ква: Ражаб Гьабибов, Али Мирзебалаев, Явер Межидов, Рамазан Бабаханов, Эрелар Фейзулаев, Абдурагьман Абдулгьалимов, Загьид Акимов, Муслим Урдиханов ва гзаф масабур. Дестедин мурад ихьтинди я: вири дуьньядин лезги спортсменар, тренерар, халкьдихъ рикI кузвай ксар сад хьана, спорт вилик тухуз куьмек гун. Сагърай чеб!
Дестедик квай ксари кIватIнавай пулунин куьмекдалди Кьиблепатан Дагъустандин лезги хуьрерин 18 спортзалдиз ва 27 секциядиз спортдин тадаракар ва маса алатар къачунва. Ихьтин куьмек агакьнавай чкайрин арада ава: ЦIийи Гъепцегьар, Усурар, Мегьарамдхуьр, Муьгъверган, Кчун-Къазмаяр, Бут-Къазмаяр, Белиж посёлок, Араблинка, Авадан, Эминхуьр, Агъа СтIал, ДаркIуш, КьепIир-Къазмаяр, Зизик, КьепIир ва мсб. Санлай къачурла, и крариз 600 агъзурдалай виниз пул харжнава. Десте арадал гъанвай ксари къейдзавайвал, абурун куьмек гуьзлемишзавай чкаяр мадни ава. Абуру кIвалах гележегдани давамардайвал я.
Дугъриданни, чи халкьдин векилрин арада гележегдикай фикирзавай ксар хьунал чна рикIивай дамахзава.
Рагнеда Рамалданова
