СтIал Сулейманан районда и йикъара  муаллимвилин бажарагъдиз къимет гудай «Йисан муаллим» конкурсдин нетижаяр кьуна, хабар гузва муниципалитетдин информациядин къуллугъди.

Малум хьайивал, сейливилин тIвар къачун патал конкурсда райондин кIуьд муаллимди акъажунарна. Конкурс­дин сергьятра аваз абуру ачух тарсар ва тарсарилай к­ъерехдай тир мярекатар, методикадиз талукь семинарар­ ва мастер-классар тухвана, гьакIни чирвилер ва тербия гунин рекье гьалтзавай кар алай мес­элаяр веревирдна.

Конкурсдин иштиракчийриз къимет гудайла са шумуд тереф фикирда кьазвай: тарсунин метлеблувал ва нетижалувал,  мектебра кIелзавай аялар чирвилер гунин гьерекатдал желб авун, класс идара авунин  ва аялрин арада рафтарвилер хушбур яз хуьнин алакьунар. ГьакIни жюриди педагогдин имидж — адан ­чирвилерин, акьулдин дережа, и ва я маса дуьшуьшра вичихъ авай  чирвилер алакъалу авунин ва абурукай менфят къачунин алакьун, муаллимвилин культура, цIийи рекьериз ачухвал, месэлаяр гьялунин адетдинбур тушир къайдаяр ишлемишун гьисаба кьуна.

Конкурсдин гьар са иштиракчиди акъажунрик цIийи са вуч ятIа­ни кутуна — хсуси тежриба, цIийи фикирар, гьиссер ва пеше­дал, аялрал рикI хьун. Гьа и терефри муаллимвилин пеше кьетIенди ийизва.

Конкурсдин гъалибчи Цмуррин юкьван образованидин мектебдин урус чIалан ва литературадин муаллим Ракьужат Алагьвер­диевадикай хьана. Кьвед лагьай чка Кьасумхуьруьн 1-нумрадин СОШ-дин сифтегьан класс­рин муаллим Зарема Юзбеговади кьуна. Пуд лагьай чкадиз ингилис чIалан тарсар гузвай пуд муаллим лайихлу хьана: Жамиля Рамазанова (КIварчагърин СОШ), Ханум Хийирбегова (Алкьвадрин СОШ) ва Гуьльмира Абдулхаликьова (Агъа СтIалрин СОШ).

Гъалибчияр тебрикунин ва шабагьар гунин мярекат СтIал Сулейманан райондин кьил Саид Темирханова кьиле тухвана.

«Чна «Йисан муаллим» конкурсдин муниципалитетда кьиле физвай пай акьалтIарна. Им муаллимвилин вири жемият патал важиблу  вакъиа я. Конкурсда иштиракуналди муаллимри неинки чпин пешекарвал ва бажарагъ раижзава, гьакIни абур пешедин рекьяй амадагар ва аялар патал чешнедиз элкъвезва.

Конкурсди муаллимар гьевесламишзава, абурун арада сагълам гьуьжетунрин «гьава» жезва, виридалайни хъсан мето­ди­каяр-къайдаяр винел акъудзава ва чирвилер гунин гьерекатдик­ цIийивилер кутаз куьмекзава. Вири и терефри образованидин­ еридиз  таъсирзава: гьикьван хъсандаказ муаллим гьазур хьанва­тIа ва адан тарсар гьикьван итижлу ятIа, гьакьван виниз жезва адан гъилик кIелзавай аялрин агалкьунар-нетижаяр. Ихьтин мярекатри  муаллимдин пешедиз ийизвай гьуьрмет  арадал гъизва, аялар тербияламишунин ва абуруз чирвилер гунин карда муаллимри къугъвазвай роль къейдзава.  Конкурсдин куьмекдалди чна  алай аямдин образованидин кар алай месэлайрални фикир желбзава.

Гьаниз килигна, чахъ аялриз чирвилер гунин гьерекат авайдалай хъсанарунихъ ва муаллимдин дережа хкажунихъ элкъуьрнавай ихьтин фикиррин-теклифрин тереф  инлай кьулухъни хуьдай ният ава. Чи уьлкведин гележег яратмишунин карда кьилин роль къугъвазвайди педагогар я. Шадвал кутадай кар ам я хьи,  муаллимдин пешедиз ийизвай итиж йисандавай-суз хкаж жезва — им чун дуьз рекье авайди тестикьарзавай делил я», — лагьана райондин кьили.

Ада неинки конкурсдин гъалибчийриз, гьакIни муаллимвилин пешедал машгъул вири педагогриз агалкьунар тебрикна, цIийи не­силар тербияламишунин карда гьакъисагъ зегьмет чIугунай сагъ­рай лагьана.

Конкурсдин эхиримжи паюниз акъатай муаллимриз райондин кьили грамотаяр ва къиметлу пишкешар гана. Сад ва кьвед лагьай чкаяр кьурбуруз муниципалитетдин образованидин работник­рин профсоюздин патайни шабагьар гана.

Саида  Мурадова