Дагъустандин пуд кархана, санлай къачурла 430 агъзур доллардин къимет тешкилзавай икьрарар кутIунуналди, международный экспортдин дережадиз акъатнава.
Идакай «Дагъустан» РИА-дин майдандал РД-дин карчивиляй ва инвестицийрин рекьяй агентстводин векилар республикадин журналистрихъ галаз гуьруьш хьайи вахтунда малум хьана. 2025-йисуз юкьван ва гъвечIи карчивилин (МСП) субъектриз куьмек гунин серенжемриз талукьарнавай и мярекатда Агентстводин регьбердин заместитель Исмаил Омарова, инвестицийрин сиясат уьмуьрдиз кечирмишунин отделдин начальник Мария Жамалутдиновади, «РД-дин экспортдиз куьмек гунин центр» АНО-дин регьберрикай сад тир Арсен Межидова ва РД-дин «Карчивилиз куьмек гунин центр» ГАУ-дин директордин заместитель Загьират Буттаевади иштиракна.
А. Межидован гафаралди, центрада экспортдин дережадиз, яни къецепатан уьлквейрин компанийрихъ галаз алишвериш тухунин икьраррал МСП-дин пуд субъект — «Армада+» ООО, ПП «Кизляр» ООО ва «Сепаратор» ЗАО — акъудна. Санлай къачурла, абуру США-дин 430 агъзур доллардин кьадарда авай икьрарар кутIуннава. Республикадин карханайрихъ галаз амадагвилин алакъаяр тайинарнавай уьлквейрин арада Иран, Оман, Белоруссия ва са жерге масабур ава.
Инал къейд ийин хьи, эхиримжи йисара Дагъустанда гьасилзавай суьрсетриз, метягьдиз, виниз тир ерилувал себеб яз, къецепатан къвердавай гзаф уьлквери итиж ийизва.
Исмаил Омарова карчийриз меслятралди куьмек гузвайдакай ва абуруз талукь тир субсидийрин сиягьдикай, гьа жергедай яз кредитрай (50 миллион манатдал агакьдалди ва 36 вацран вахтуналди къачунвай) процентар гудайла пулунин са кьадар пай эвез авунин серенжемдикай лагьана.
2025-йисан сифте кьилелай, хабар гайивал, гъвечIи ва юкьван карчивилин 5 карханадиз санлай къачурла 10,3 миллион манатдин кьадарда авай субсидияр ганва.
Мария Жамалутдиновади «са дакIардин» къайдадин гъавурда туна ва инвестицийрин адетдинни гегьенш проектрин арада авай тафаватдикай лагьана. Загьират Буттаевади центради тухузвай кIвалахдикай ва хсуси бизнес гъиле кьаз кIанзавай ва я кардик квай карчийриз гузвай куьмекдикай (гьа гьисабдай яз СВО-дин иштиракчияр ва абурун хизанар патал гьазурнавай программайрикай) суьгьбетна.
Мярекатдал гьакIни къейд авурвал, образованидин федеральный «СВОй бизнес» проектдин сергьятра аваз ва РД-дин Гьукуматдин куьмекдалди 2025-йисан 11 вацран вахтунда СВО-дин 79 иштиракчиди ва абурун мукьва-кьилийри (уьлкведин мулкунал виридалайни гзаф кьадар) центрадин куьмекдалди чирвилер къачуна.
Жасмина Саидова
