ЧIехи Гъалибвилин 80 йисан юби­лей­дин ва Ватан хуьзвайбурун йисан лишандик кваз Ватандин Игитрин югъ къейдна­. И вакъиадиз талукь яз Ахцегь райондин школайра ватанперес­вилин тарсар-мярекатар теш­килна, райондин кьилин биб­лио­текадин кIелдайбурун залда­ элкъвей столдихъ суьгьбет кьи­ле тухвана.

Культурадин управлениди теш­килай и мяре­катда рай­ондин администрациядин, образованидин, жемиятдин тешкилатрин, Ахцегь погранчастунин, СМИ-рин ве­килри, гьакIни СВО-дин иштиракчийрини абурун диде-бу­байри иштиракна.

Райондин депутатрин собранидин председатель Гьажимурад Парпачева вичин ва райондин кьил Абдул-Керим Палчаеван патай­ мярекатдин иштиракчийриз Ва­тандин Игитрин югъ мубаракна.

…Алай вахтунда чун Ватандин­ кьисмет гьялзавай акьал­тIай­­ жа­ваб­дар ва вуж вуж ятIа чир жезвай четин девирда яшамиш жезва. Жемиятди кьетIендиз ва­танперес­вал истемишзава. Акьалтзавай несил ватанпересвилин руьгь­дал­лаз тербияламишун патал чи вилик алай девирдин ва Ватандин ЧIехи дяведин игитрин чешеяр ква. Чи арайра авай адетдин инсанрикай СВО-да Ватандин игитар жезва.

СВО-дин майданра 26 агъзурдав агакьна дагъустанвийри миллетбазрихъни фашистрихъ галаз Ватандин ва дуьньядин ислягьвални гьахъ патал женг чIугвазва. Гьелбетда, абуруз чи патай, эвелимжи нубатда, руьгьдин­, гьакIни маса куьмекар герек я. Дяведин четин макъамда фронтни далу пад сад жедай адет я. Халкьдин патай ас­керрив куьмекни агакьзава. 17 кас дагъвийрикай РФ-дин Иги­тар хьанва, 14 агъзур кас гьукумат­дин женгинин шабагьриз лайихлу­ хьанва. Эхь, гьар са шабагь — им аскерди­ ви­чин кьегьалвилин, жуьрэтлувилин, ватанпересвилин руьгь­дин мягь­кемвал, тербия-къилих кьетIен шартIара ахтармишун я. Уьмуьрдин и имтигьандай чи гадаяр ла­йихлувилелди акъатзава.

Инсафсуз дяве я кьван, гьа­йиф­ хьи, телефвилерни ава. «Ас­кер женгина ваъ, ам несилрин ри­кIерай акъатайла рекьизва» лугьудай ихтилат ава. Гьа са вахтунда абур гьамишалугъ чан алаз амукьун патал игитар рикIелай алуд тавун чи пак буржи я. Ватан патал чанар къурбандзавай кьегьалар, чпин тIварар куьчейризни майданриз ягъуналди, гуьмбетар хкажуналди чи рикIера гьамишалугъ яз амукьда, абурун баркаллу чешнейралди чна цIийи несилар тербияламишда. Рухваяр дидейри игитар яз хазвач эхир, абур гьа и тегьерда тербияламишзава…

Мярекатда Ахцегьрин тарихдин ва край чирдай музейдин директор Агьмед Дагъларова, и цIа­рарин авторди, районда респуб­ликадин жемиятдин «Память гор» тешкилатдин векил Абубакр Вагьабова, райондин общественный палатадин председатель Шимси­дин Арухова, ветеранрин со­вет­дин председатель Нажмудин­ Гудаева, дишегьлийрин советдин председатель Таира Муспагьовади, СВО-дин ветеран Расим Агьмедова, муаллимар тир Инжи Жалиловади, Мая Гьажиевади, Жамиля Саидовади, культурадин уп­равленидин начальник Къистер Гъаниевади иштиракна.

Дашдемир  Шерифалиев