Россиядин Яракьлу Къуватрин кьушунри эхиримжи йикъара махсус серенжемра къазанмишзавай гъалибвилериз килигайла ахьтин фикирдал къвезва хьи, Украинадин кьиле акъвазнавай миллетбазар, чпин халкьдин душманар ислягьвилин икьрар кутIундай чкадал къвезвай хьтинди я. Чи аскерри са-са хуьр, шегьер цIийи фашистрикай азадзава. Халкьдин къатари абурув датIана герек куьмекарни агакьарзава. И жигьетдай Дагъустанни вилик жергейра ава.
Кьилди къачуртIа, Мегьарамдхуьруьн райондин агьалийри СВО-диз са шумудра мергьяматлувилин парар агакьарнава. Ингье гилани районда «Окоприн шемер. Самурдин чимивал» лишандик кваз зурба мярекат кьиле фена. Адак райондин администрациядин кьил Нариман Эфендиеван иштираквални аваз кьил кутурди СВО-дин игит Руслан Примован диде Айида Примова я. Вирироссиядин серенжемдик акатзавай и мярекатди вири уьлкведа гзаф инсанар желбзава. Ада райондин хейлин школайрин коллективри, дяведин махсус серенжемдин иштиракчийри, абурун диде-бубайри ва маса агьалийрини иштиракна.
Россиядин ва Дагъустандин гимнийрихъ яб акалайдалай гуьгъуьниз кIватI хьанвайбурун вилик Нариман Эфендиев рахана.
«Чи кьилин везифа акьалтзавай несилдиз ватанпересвилин тербия гун ва Россиядин яракьлу кьушунриз куьмек гунин кардал жезмай кьван гзаф школьникар желб авун я. Къе чна гьазурзавай ва Донбассдиз рекье твазвай шемер аскерриз, лап герек шейэр я. Абуру эквни чимивал гузва. Чна ракъурзавай пичерал аскерри чпиз хуьрекарни гьазурда. Гьар сада чи кьушунар гъалибхьунин кардик вичин пай кутун важиблу я».
Школьникри ва муаллимри, диде-бубайри 2000-далай виниз шемер гьазурна. Райондин администрациядин кьили аялриз шемер гьазурунин жигьетдай халис мастер-класс къалурна. Ахпа аялрихъ галаз ада гьазуран шемер ящикра туна.
Нариман Эфендиев школьникри СВО-да авай аскерриз кагъазар кхьизвай майдандал фена. Ина виридаз аквадай чкадал «Жуьрэтлувиляй» кьве ордендин сагьиб, СВО-да телеф хьайи Руслан Примован, Ватандин ЧIехи дяведин иштиракчийрин ва фашистрин лагерра хьайи ксарин шикилар эцигнавай. Са рахунни алач, абуру гьар девирдин несилрин арада авай алакъайрин гьакъиндай шагьидвалзавай.
«Куьн пара сагърай, ихьтин кар ийизвай. Квез чидани, куь чарари аскерар гьикьван шадарзаватIа. Куь чимивилив, Ватан кIанивилив ва шад гуьгьуьлрив ацIанвай гафари абурун руьгь хкажзава. Чи аскерри гьар са гьужумда миллетбазар кукIварзава ва Донбассдин мулкар азадзава», — лагьана Нариман Эфендиева.
Абад Азадов
