Кардик кутунва

«Азимут» авиакомпанияди Махачкъаладай Саудиядин Аравиядиз сад лагьай рейс авунва. Идакай «Аэропорт Махачкъала» телеграм-каналди хабар гузва.

3-декабрдиз «Азимут» авиакомпания­ди «Милли Хадж Компания» ООО-дихъ галаз амадагвилин алакъайрин жигьетдай кутIуннавай икьрардин бинедаллаз «Махачкъала — Джидда» маршрутда сад лагьай рейс кьилиз акъуднава.

Хабар гузвайвал, рейсер гьафтеда кьве сеферда кардик кутунва:

A49681 — Махачкъаладай арбе ва гьяд йикъара лув гуда: йифен сятдин 12-даз 10 декьикьа кIвалахайла (23:10); Джидда шегьердив агакьзавай вахт: экуьнин 4 жез 20 декьикьа амайла (03:40 (+1)).

A49682 – Джидда шегьердай ислен ва хемис йикъара лув гуда: экуьнин 5 жез 20 декьикьа амайла (04:40); Махачкъаладив агакьзавай вахт: экуьнин сятдин 9 (09:00).

КIватIна акьалтIарнава

Дагъустандин аграрийри тумунин гьажибугъдаяр кIватIна акьалтIарнава. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмеди гъизвай делилралди, рес­пуб­ликада 2025-йисуз 12,1 агъзур гектардин майданрай 51,1 агъзур тонндив­ агакьна и магьсул кIватI хъувунва. 2024-йисав ге­къи­гайла, и рекъем 4,9 процентдин гзаф хьанва.

Къейдзавайвал, тумунин гьажибугъдаяр Дагъустандин 31 районда гьасилзава. Виридалайни гзаф бегьерар агъадихъ галай районрин хуьруьн майишатдин суьрсет гьасилзавайбуру кIватI хъувунва:

— Хасавюрт район (14,6 агъзур тонн);

— Дербент район (7,1 агъзур тонн);

— Къизляр район (5,5 агъзур тонндилай гзаф).

Министерстводин телеграм-каналдин малуматралди, республикада гьажибугъ­дайрин бегьерлувал гектардай, юкьван гьи­сабдалди, 42 центнердилай гзаф хьанва.

И рекъемдал гьалтайла, кIвенкIвечи жергейра агъадихъ галай муниципалитетар ава:

Къизляр район (гектардай — 75,3 центнер);

Ахвах район (гектардай — 71 центнер);

Къайтагъ район (гектардай — 70 центнер).

РикIел хкин, виликдай 2025-йисуз Да­гъустанда мелиорациядин хиле 52 проект кьилиз акъудун пландик кутунвайдакай хабар ганай. Абурун арада ихьтин проектарни ава: 3,71 агъзур гектардин майданрикай ибарат мулкунал гидромелиора­ция­дин 11 проект; культуртехнический мярекатриз талукь 32 проект (абур кьилиз акъуддайла 5,23 агъзур гектардин майданар ишлемишда) ва масабур.

ЭлячIдай чка эцигун патал

Махачкъаладинни Каспийскдин арада авай куьгьне шегьре рекьин винел 90 миллион манатдихъ цIийи «рекьин винелай элячIдай чка» (надземный переход) эцигда. Идакай «Дагъустандин экономика» телеграм-каналди хабар гузва.

РД-дин «Государственная экспертиза проектов» ГАУ-ди «Махачкъала-Турали- Каспийск» шегьре рекье цIийи рекьин винелай элячIдай чка эцигуниз талукь проектдин документациядин ва инженеррин ахтармишунрин нетижайрин гьакъиндай разивилин къарар ганва.

Чешмедин малуматралди, и объект эцигунин макьсад рекьелай элячIзавай агьалийрин хатасузвал таъминарунихъ галаз алакъалу я. Адан яргъивал — 64,68 метрдиз ва яхдиз фидай паюнин гьяркьуьвал 3 метрдиз барабар жеда.

Эцигунрин сергьятра аваз мягькем гигер кардик кутунин, рекьерин лишанар эцигунин, даяхар, гурарин къурулушар ва махсус майданар хкажунин, гьакIни яхдиз фидай пай туькIуьрунин, светодиодный лампайралди эквер тунин кIвалахар кьилиз акъудда.

Проектдин сметадин къимет 94,3 мил­лион манатдикай ибарат я. Объект «Разви­тие территориальных автомобиль­ных­ дорог республиканского, меж­му­ни­ци­пально­го и местного значения РД» тIвар алай Да­гъустандин госпрограммадин сер­­гьят­ра­ аваз пулдалди таъминарун план­дик кутунва.

Идалай вилик республикадин Гьукуматдин телеграм-каналди хабар гайивал, Дагъустанда 2025-йисуз 384 километр рекьер тамамдиз цIийикIа туькIуьр хъувунва.

Гьазурайди — Муса  Агьмедов