Са жерге мярекатар
2025-йисуз Дагъустанда мелиорациядин хиле 52 проект уьмуьрдиз кечирмишун пландик кутунва. Идакай РД-дин хуьруьн майишатдин ва недай суьрсетдин телеграм-каналди раижзава.
Пландик кутунвай мярекатрин гьисабдик ибурни акатзава:
— 3,71 агъзур гектар майдандикай ибарат мулкунал гидромелиорациядин 11 проект;
— 5,23 агъзур гектар майдан кардик кутунал желбдай культуртехнический мярекатрин 32 проект ва мсб.
Гьа са вахтунда чешмеди 2026-йисан планрикайни раижзава. Къейдзавайвал, набататар цун ва малдарвал вилик тухун патал мелиоративный мярекатрин метлеблувал фикирда кьуналди, Россиядин хуьруьн майишатдин министерстводиз 2026-йисан конкурсдин хкягъуна иштиракун патал мелиорациядин 95 проектдай арзадин документация къалурнава. Абурукай 32 проект 4477,7 гектарда гидромелиоративный мярекатар тухуниз талукь я, 46 проект — 7127,9 гектарда культуртехнический мярекатар тухуниз, 17 проектни 5110 гектарда фитомелиоративный мярекатар тухуниз.
Хабар гузвайвал, и проектар уьмуьрдиз кечирмишун патал федеральный бюджетда 2026-йис патал 659,1 миллион манат фикирда кьунва.
2,3 сеферда тIимил хьанва
Дагестанстатди алай йисан 10 вацран къене яшамиш хьун патал гьазурнавай яшайишдин кIвалерин кьадардиз талукь делилар чапнава. Идакай «Дагъустан» РИА-ди раижзава.
Къейдзавайвал, 2025-йисан 10 вацра республикада, санлай къчурла, 1 миллионни 220,5 агъзур кв. метрдин кьадарда аваз яшайишдин кIвалер гьазурнава. Гьа са вахтунда, чешмеди хабар гузвайвал, винидихъ къалурнавай рекъем, алатай йисан и муддатив гекъигайла, 2,3 сеферда тIимил я.
ШартIар хъсанарнава
Дагъустандин саки 29 агъзур хизанди чпин яшайишдин кIвалерин шартIар СФР-ди гузвай дидевилин капиталдин такьатрин куьмекдалди хъсанарнава. Идакай Россиядин Яшайишдин фондунин Дагъустанда авай отделенидин телеграм-каналди хабар гузва.
Чешмеди раижзавайвал, дидевилин капиталдин программа 2030-йисалди давам жезва.
СФР-дин сайтдин делилралди, 2025- йисуз сад лагьай аял хьайила, дидевилин капиталдин сергьятра аваз гузвай такьатрин кьадар — 690 агъзурни 266 манатни 95 кепекдиз, кьвед лагьай ва гуьгъуьнин (эгер виликдай къачунвачиз хьайитIа) аялар хьайила, гузвай пулдин кьадар 912 агъзурни 162 манатни 09 кепекдиз барабар я.
Рекьериз талукь яз
Дагъустанда 2025-йисуз 384 километр рекьер капитальнидаказ ремонт хъувуна. Идакай махсус мярекатдал, РД-дин транспортдин ва рекьерин майишатдин министрдин везифаяр вахтуналди тамамарзавайди тир М. Тагьирова раиж авур къейдерал асаслу яз, республикадин кабминдин телеграм-каналди хабар гузва. Ихьтин нетижайрив, пулдин такьатралди таъминарунин кьадар 23,1 миллиард манатдиз барабар яз, «Развитие транспортного комплекса Республики Дагестан» госпрограмма уьмуьрдиз кечирмишун себеб яз агакьариз алакьна. Къейдзавайвал, 2025-йисан 1-ноябрдин делилралди, вичикай ихтилат физвай серенжем 80 процентдин кьилиз акъуднава.
Кьилди къачуртIа, 9,9 километр рекьер, яргъивал 546,9 п. метрдиз барабар тир 11 муьгъ эцигнава ва цIийи къайдада туьхкIуьрнава, гьакI маса серенжемарни кьиле тухванва.
Гьа са вахтунда чешмедин къейдерай малум жезвайвал, гьа и мярекатдал раиж авур делилралди, дагъларин чкайра рекьер цIийикIа туьхкIуьрун патал 7 миллиард манат ракъурнава. Кьилди къачуртIа, чешмеди хабар гузвайвал, дагъларин мулкар вилик тухунин серенжемдин сергьятра аваз, 2025-йисуз чпин яргъивал 132 километрдикай ибарат тир 87 объектдал цIийикIа туьхкIуьрунин ва капитальнидаказ ремонт авунин мярекатар кьиле тухузва.
РикIел хкин, виликдай РД-дин транспортдин ва рекьерин майишатдин министерстводин телеграм-каналди Дагъустанда «Уьмуьр патал инфраструктура» милли проектдин сергьятра аваз кьиле тухузвай рекьер ремонт авунин серенжем акьалтIзавайдакай раижнай. Чешмеди къейдзавайвал, 2025-йисан пуд лагьай кварталдин нетижайралди, Дагъустанда кIвалахар 24 объектдал акьалтIарнава, абурукай 2 ишлемишиз вахканва.
Гьазурайди — Муса Агьмедов
