Метлеблу гуьруьш
Россиядин Президентдин куьмекчи Юрий Ушакова къейд авурвал, Владимир Путина 2-декабрдиз Кремлда США-дин векилрихъ галаз метлеблу гуьруьш кьиле тухвана. Идакай «РИА Новости» чешмеди хабар гузва.
США-дин президент Дональд Трампан махсус илчи Стив Уиткоффахъ ва Жаред Кушнерахъ галаз кьиле фейи гуьруьш вад сятда давам хьана. «Гуьруьшдал Украинадин къалмакъал къайдада тунин патахъай США-ди теклифзавай план веревирдна. 27 пунктуникай ибарат документ чав агакьарна, чун адахъ галаз таниш хьана. <…> Гуьгъуьнлай чав мад са шумуд документ агакьна, абурукай кьуд къе веревирдна», — лагьана Ю. Ушакова.
Президентдин куьмекчиди къейд авурвал, документда къалурнавай бязи месэлайрилай Россиядин терефдивай разивал ийиз жеда, амма са кьадар теклифар критика ийиз жедайбур я.
Гуьруьшдин вахтунда кьве терефди мулкариз талукь месэлани веревирдна. Ю. Ушакова алава хъувурвал, Москва ва Вашингтон кьиле фейи рахунрин мана галай-галайвал раиж тавунин патахъай меслят хьанва, гьикI хьи, кьилиз акъудна кIанзамай еке кIвалахар вилик кума.
Къейд ийин, Россиядин патай гуьруьшда РПФИ-дин (Российский фонд прямых инвестиций) директор Кирилл Дмитриевани иштиракна. Москвадиз къведалди вилик Америкадин векилри Флоридада Украинадин векилрихъ галаз гуьруьш кьиле тухванай.
Кремлда кьиле фейи гуьруьшди гележегда къалмакъал арадай акъудунин рекьер веревирддай, гьакIни ислягьвал арадал хкунин жигьетдай кIвалах саналди давамарунин гьакъиндай меслятдал къведай мумкинвал гана. Эхирдай В. Путина Д. Трампаз саламар ва сиясатдин са шумуд сигнал ракъурна.
Алатай гьафтеда Владимир Путина США-дин план Украинада къалмакъал ислягьвилелди къайдада тунин бинедиз къачуз жедайди я лагьанай.
Махсус серенжемдикай
Махсус серенжемда иштиракзавай чи аскерри гьар юкъуз агалкьунар къазанмишзава. РФ-дин оборонадин министерстводи хабар гайивал, и йикъара «Кеферпад» кьушундин аскерри Харьковдин областдин Волчанскдин ислягь агьалияр хатасуз чкадиз акъудна. И четин серенжем абуру агалкьунралди кьилиз акъудна.
«Центр» кьушунрин аскерри «Град» яракьдай Красноармейскдин мулкара авай ВСУ-дин даяхдин пункт тергна.
Оборонадин министерстводи мадни хабар гузвайвал, 2-декабрдин йифен вахтунда Украинадин терефди чи регионрихъ ахъаяй самолетдин жуьредин пилот галачиз лув гудай 45 аппарат Россиядин ПВО-дин такьатрин куьмекдалди кьуна. Кьилди къачуртIа, Брянскдин областда — 14 беспилотник, Краснодардин крайда — 8, Крымда — 6, Волгограддин областда — 5, Чечняда — 4, Ростовдин областда — 2, Орелдин областда — 1, Липецкдин областда — 1, Твердин областда — 1, ЧIулав гьуьлел — 3.
2-декабрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 668 самолет ва 283 вертолет, зенитный ракетайрин 638 комплекс, пилот галачиз лув гудай 99831 аппарат, 26 337 танк ва дяведин маса машинар, РСЗО-дин 1623 машин, артиллериядин ва маса 31 682 яракь, военный махсус 48 144 автомашин тергна.
Китайдай — визаяр галачиз
Туриствилин ва я карчивилин макьсадар аваз Россиядиз къвез кIандай китайвийри гила визаяр туькIуьрун герек амукьзавач. Ихьтин делилар РФ-дин Президент В.Путина акъудай къарарда къалурнава.
Документдал асаслу яз, КНР-дин агьалийривай виза галачиз Россиядин мулкара 30 йикъан муддатда акъвазиз жеда. ЦIийи къайда 2026-йисан 14-сентябрдалди къуватда жезва.
Къейд ийин, идалай вилик ихьтин жуьредин къарар Китайдин гьукумдаррини кьабулнай, гьамни 2026-йисан 14-сентябрдалди къуватда жеда.
Гьазурайди — К. Ферзалиев
