Халкьдиз «Куьне квез гьуьрмет ая тIун» лагьана веси авур Етим Эминан юбилейдиз талукьарна, алай йисуз культурадин маканра, школайра гьар жуьредин мярекатар кьиле тухвана.

А.А. Гьабибован тIварунихъ галай КIах­­цугърин юкьван школада, Етим Эминан юбилейдиз талукьарна, тухвай мярекатдиз виликамаз хъсан гьазурвал акунвай. Кьилди къачуртIа, школада Е. Эминан ктабрин выставкаяр, «Етим Эмин — лезги поэзиядин экуь чирагъ», «Эмина лезгийриз, Пушкина урусриз хьиз, вичин — Эминан чIал багъишна» стендар акъуднавай.

Мярекатда райондин образованидин отделдин начальникдин заместитель Расул Къагьриманова, ИМЦ-дин методист Назират Мегьамедовади, школадин директор Мевлуьдин Эскерова, хуьруьн мис­кIиндин имам Расул Агьмедова, хуьруьн яратмишдай интеллигенциядин векилри иштиракна.

Винидихъ тIварар кьур юлдашри Етим Эминан уьмуьрдин ва яратмишунрин рекье­рикай, адан устадвиликай, шаирвилин бажарагъдикай метлеблу ва гьар са касдин рикIиз таъсирдай суьгьбетар авуна. Абуру къейд авурвал, Етим Эминан шииррихъ­ кьетIен гуьрчегвал ава. Шииррин къурулуш­ къешенг я, везиндихъ аламатдин цIал­цIам­вал ава, образар ачух я, чIал са патахъай регьят я, муькуь патахъай — авазлу.

Рахай юлдашри ва школадин кьиле авайбуру мярекатдиз спонсорвилин куьмек гунай кьегьал хва Ханбала Назимович Ханбалаеваз сагърай лагьана. Рахунрилай гуьгъуьниз, Етим Эминан уьмуьрдиз ва яратмишунриз талукьарна, адан шиирар хуралай кIелунай, сочинение кхьинай ва шикилар чIугунай конкурсар кьиле фена. Абура мектебда кIелзавай саки вири аялри иштиракна.

Аялрин алакьунриз ва устадвилиз обра­зованидин ИМЦ-дин пешекаррикай­­ иба­рат­ жюриди къимет гана. Нетижа­да­ ши­и­рар кIе­лунай 1-чка Диана Гьа­жи­балае­ва­ди (8-кл.), 2-чка Анжелика Кчи­беговади­ (7-кл.), 3-чка Лариса Къасимовади (7-кл.) кьуна. Етим Эми­нан яратмишунрикай сочинение кхьинай 1-чкадиз Наида Гьамзатова (9-кл.), 2-чкайриз Анжелика Кчибегова (7-кл.), Диана Гьажибалаева (8-кл.), 3-чкайриз Мегьамедагъа Фейламазов (5-кл.) ва Лариса Къасимова (7-кл.) лайихлу хьана. Шикилар чIугунай 1-чка Арина Гьамзатовади (4-кл.), 2-чка Анжелика Кчибеговади (7-кл.), 3-чкаяр Эмилия Абдулкеримовади (9-кл.), Имираслан Кчибегова (3-кл.) ва Мадина Гьамзатовади (5-кл.) кьуна.

Конкурсра тафаватлу хьайи школьник­риз пулунин пишкешар, райондин образованидин отделдин патай гьуьр­метдин грамотаяр гана.

Асият  Мирзалиева,

Хазран  Кьасумов