22-ноябрдиз Дербентда, Лезгийрин госмуздрамтеатрдин залда, чи литера­ту­ра­­­дин классик Етим Эминан шиирар хъсандиз кlелунай шегьердин мектебра кIелзавай аялрин арада конкурс кьиле фена. Мярекат «Возрождение Дербента» тIвар алай хийирлу крарин фондунин регьбер И. Яралиеван тек­лифдалди ва ада къуьн кутуналди кьиле фена.

ЧIалан сувар мубарак авуналди, мярекат тешкилиз куьмек гайи шаир Азиз Мирзебегова, конкурсдин иштиракчийрихъ эл­къвена, икI лагьана: «Чи фикирдалди, чи халкьдин руьгьдин пайдах хьуниз лайихлу­ тир шаир анжах Етим Эмин я. Кьакьан дагъ яргъалай хъсандиз аквадай хьиз, Етим Эмин яшамиш хьайи девир чавай яргъал хьунивай чаз шаирдин руьгьдин кьакьанвал ва адан поэзиядин зурбавал мадни хъсандиз аквазва. Етим Эмина вичин шаирвилин къудратдалди халкьдин руьгь, чIал, чи милливал, лезгивал хвена».

Конкурсда, санлай къачурла, 35 аялди иштиракна. Абур кьве дестедиз пайна. Сад лагьай дестеда 1-5-классра кIелза­вайбуру, кьвед лагьай дестеда 6-11-класс­ра кIелзавайбуру иштиракна.

Аялрин алакьунриз къимет гузвай жюридик Лезги театрдин директор Динара Эмино­ва, кьилин режиссер, РД-дин лайихлу артист­ Казбек Думаев, РД-дин искусствойрин ла­йих­­лу деятель, композитор, «Лезги газетдин» хсуси корреспондент тир и цIарарин ав­тор, Дербентдин педколледждин лезги чIа­­ланни литературадин муаллим Рагнета Алибегова ва шаир, лезги чIаланни литерату­радин муаллим Гъулангерек Ибрагьимова квай.

Саки вири аялри шиирар хуралай хъсандиз кIелна. Къазанмишнавай баллриз килигна, ихьтин нетижаяр хьана.

Сад лагьай десте: 1-чкадиз Зейнаб Набиюлаева­ (СОШ №20, 4-кл., муаллим­ Р. Муминова), 2-чкадиз Алия Мегьамедова (СОШ №15, 5-кл., муаллим Р. Алиева), 3-чкадиз Фарид Къурбанов (СОШ №13, 4-кл., муаллим Л. Савзиева). Кьвед лагьай десте: 1-чкадиз Муьгьуь­дин Гьасанов (гимназия №18, 8-«Д» кл., муаллим Т. Магь­му­дова) 2-чкайриз Марьям Алискерова (Гимназия №18, 8-«Б» кл., муаллим Ж. Амаханова) ва Аида Демирова (СОШ №3, 8-кл., муаллим А. Къафланова), 3-чкайриз Милана Къадималиева (СОШ №8, 9-кл., муаллим С. Эседова), Перис Исаева (СОШ №11, 9-кл., муаллим Н. Бабаева) лайихлу хьана. КIвен­­кIвечи ва шабагьдин чкаяр кьур сад лагьай дестедин аялриз ва абур гьазурай муаллимриз 1-чкадай — 12 агъзур манат, кьвед лагьай чкадай — 10 агъзур манат ва пуд лагьай чкадай 7 агъзур манат  ва грамотаяр гана, кьвед лагьай дестедин гъалибчийриз: 1-чкадай — 12 агъзур манат, кьвед лагьай кьве чкадай — 8 агъзур манат ва пуд лагьай кьве чкадай 6 агъзур манат ва грамотаяр гана. Абур фондунин крар кьилиз акъудзавай директор Саид Мусаева вахкана. Чкаяр кьун тавур гьар са аялдиз ашкъиламишдай агъзур манат гана.

Мярекат театрдин актерар тир Амалия Керимовади ва Мегьамедрасул Шихкъеибова кьиле тухвана.

Къагьриман Ибрагьимов