СтIал Сулейманан райондин Экенар арадал атай вахт пешекарри тайинарнавач. Хуьруьн тIварцIи вучтин мана гузватIа, гьадазни талукь тирвал баян гуз хьанвач. Хуьр райцентр тир Кьасумхуьруьвай 9 километрдин яргъа ава.
1886-йисан переписдин делилралди, Экенрин хуьре 36 майишат ва 166 агьали (93 итим ва 73 дишегьли) авай. Хуьруьвай кьибле патахъ 3 километрдин мензилда тепе хьтин чкадал археологиядин памятник — Куьгьне Экен хуьр ала. Куьгьне Экенрин рагъакIидай патан къерехда мискIиндилай анихъ Абдулкерим НуьцIуьгъвидин пIир-мавзолей ава. Ам алай чкадивай 80 метрдин яргъа мензилда сурун кьилихъ жедай стела аквазва. Тарихдин итижлу памятник яз гьисабзавай мемориалдин плита-хроника мискIиндин къене, мигьрабдин чапла пата, чилин (полдин) дережада ава.
1963-йисуз хуьруьнвияр дуьзенлухдиз куьч хьана. ЦIийиз куьч хьайи чка НуьцIуьгъринни КIварчагърин арада ава. Берекатлу, мублагь, пара гуьрчег чкаяр я. Хуьруьнвийри техил гьасилзава, багъларихъни ципицIлухрихъ гелкъвезва, мал-хеб хуьзва.
Чи йикъара хуьре 134 кIвал ава, жемят 439 касдикай ибарат я. Экен КIварчагърин хуьруьн администрациядик акатзава.
Мурад Мегьамедкеримован «СтIал Сулейманан район: тарихдин гелерай» ктабдай.
