Алакьунар авай жаван
21-октябрдиз Кьасумхуьруьн медениятдин маканда Дагъустандин медениятдин ва чIаларин йикъаз талукьарнавай чIехи мярекат кьиле фена. Адан сергьятра аваз, аялрин арада хъсандиз шиирар кIелунай конкурсни тешкилнавай. Чна ана кIвенкIвечи чка кьур, мергьяматлувилин «Умуд» фондунин патай пишкешдиз лайихлу хьайибурукай сад тир Муслим Идрисовахъ галаз ихтилатарна.
Ам 2012-йисуз Махачкъала шегьерда Арсен Идрисован хизанда дидедиз хьана. Алай вахтунда жаванди Кьасумхуьруьн «ЦIийи хуьр» микрорайондин юкьван мектебда 7-классда чешнелудаказ кIелзава.
Муслимаз хайи чIал гзаф кIанда. Ада лезги чIалал шиирарни кхьизва. Жаванди къейдзавайвал, сад лагьай шиир ада 4-классда кIелзавайла кхьенай. Вичин яратмишун ада, кичIез-регъуьз, классдин руководитель Успагьи Цмиевадиз къалурна. Аялди кхьенвай цIарариз килигна, шиир акьван туькIвейди хьанвачиртIани, муаллимди адак руьгь кутадай, гьевес хкаждай алхишдин гафар лагьана. Муаллимдин патай тарифриз лайихлу хьайи аялдик руьгь акатна: ам лезги чIални эдебият генани дериндай чириз алахъна.
Мукьвара мектебда Дагъустандин халкьарин садвилин йикъаз талукьарнавай мярекатдал Муслима фасагьатдиз кIелай «Дагъустан» шиир яб гузвайбуру хушдиз кьабулна.
Хайи чIал, эдебият дериндай чируниз фикир гузвай жаванрин кьадар къвердавай тIимил жезвай вахтунда Муслим Идрисов хьтин аял пайда хьуни шадвал кутазва. Хъсандиз кIелиз, вичел кIвалахиз хьайитIа, шак алачиз, Муслимакай лезги чIалан пешекар, муаллим ва шаир жеда. Агалкьунар хьурай жавандихъ!
Къагьриман Ибрагьимов
____________________________________________________
Муслим Идрисов
ЧIехи Гъалибвал
ЯхцIурни сад лагьай йисуз,
Гад атайла гуьлуьшан,
ЧIехи дяве хьана лугьуз,
Хабар ганай перишан.
Гьикьван четин вядеяр тир,
Фашистри кьил хкажнай.
Дуьнья михьиз дявеяр тир,
Гитлер кьиле акъвазнай.
Шумуд агъзур инсан фенай,
Жуван хайи Ватан хуьз.
Эхир Гитлер вични кьенай,
Тама авай къабан хьиз.
Каша гьатна, ичIиз руфун,
Шад жез фан кIус жагъайла.
Акатзава чандик зурзун,
А вахт рикIел хтайла.
Тармар хьанай шумуд инсан,
Шумуд хизан чIур хьанай.
Цуькведавай Совет ватан
Яракь кьаз мажбур хьанай.
Фенай вири яракьар гваз
Терс душмандиз кIур гун патал.
Кьегьалри хьиз ягъунар кьаз,
Фашистрин тум, пун кун патал.
Берлиндиз кьван фенай ахпа,
Пагь атIанай душманрин.
Чаз гъалибвал гъанай зурба —
Шаднай рикIер инсанрин.
Рейхстагдал тикнай пайдах,
Фашистрин рикI атIанай.
Яру аскер, ийиз дамах,
Гъалибвал гваз хтанай.
Ша, халкьар, чун сад жен вири,
Тергин дяве чилерал
Ислягь хьурай гьардан ери,
Экуь цав хьуй кьилерал!
Шарвили
Чи лезгийрихъ хьанай са хва
Къуват авай пара зурба.
Шарвили тIвар алай адал,
ЧIехи хьанай акваз-такваз.
Пуд йисаваз хвенай нехир,
Агуд тийиз вагьши ничхир.
Дагъдин цIегьер, миргер ягъиз,
Кесибариз якIap пайиз.
Гьуьрмет хьанай Ахцегь хуьре,
КIвал эцигнай КIелед хиве.
Лезги халкьдиз тир ам машгьур,
Касбубади гатанай тур.
А кьадар тир адан къуват,
Санал ярхриз яцар са вад.
ВацIарилай хкадардай,
Уьфт ягъиз, paг ацадардай.
Ахцегь, Куьре хуьн чна лугьуз,
Хаин душман атай чIавуз
Лезги халкьдиз эвер ганай,
КIватIнай кьушун гьарма санай.
Женгиниз ам фенай бирдан,
Гьална вичин юргъа балкIан.
Хуьда лугьуз лезги халкьар,
Тахьуй лугьуз абур лукIар.
Эхирдалди тухуз дяве,
Кьил, пайдах хьиз, кьуна вине.
«Гьурра» гана, хкажнай тур,
Катнай душман ам къвез акур.
Хайи ватан хьанай азад,
Хтаначир душманар мад.
Гьа йикъалай лезги чилел
Хъхьайди туш душманрин гел.
«Лезги газетдин» 2025-йисан 42-нумрадай.
