Акьулни нефс

Акьул:

— Акьулди лугьузва: я нефс,

И дуьньядай фидачни вун?

Эхир са къуз кьуна нефес,

МичIи сура жедачни вун?

 

Нефс:

— Дуьньядай зун фида лугьуз,

Жегьеннемда куда лугьуз,

Женнетар жагъидач лугьуз,

КIани рекьяй фидачни зун?

 

Акьул:

— Гьелбетда, нефс, я вун залим,

Вахъ галаз гьикI хьуй ругьалим?

Жегьеннем азаб я элим,

Кабаб хьана, кудачни вун?

 

Нефс:

— Ви гафар за авуна таб,

Гудач хьи садазни яб.

Эцигна са еке лакъаб,

Шадвилел къекъведачни зун?

 

Акьул:

— Акьулди лугьузва ваз,

Язух я, нефс, ша дуьз акъваз.

Насигьат яхъ лугьун за ваз,

Дуьз рекьел элкъведачни вун?

 

Нефс:

— Насигьатар за кьаз хьайтIа,

Негь кардивай яргъаз хьайтIа,

Ваз кIанивал зун къвез хьайтIа,

Пашманвилел жедачни зун?

 

Акьул:

— Нефс  захъ галаз хьана душман,

ЧIуру кардиз гуда фарман,

«Минет хьуй ваз аку дарман» —

Лугьуз, са къуз шедачни вун?

 

Нефс:

— Хьана ашукь зун гьавадал.

Пехил хьана къаст чарадал,

Мал къазанмишна арадал,

Гьамиша икI жедачни зун?

 

Акьул:

— А лезетар жагъидач ваз,

КIанибур нез, кIанибур хъваз.

Бес я, душман нефс, вун акъваз,

Захъ галаз дуьз къведачни вун?

 

Нефс:

— Вахъ галаз зун дуьз атайтIа,

Хушвилелди вав рахайтIа,

ШейтIандивай яргъаз хьайтIа,

Адаз такIан жедачни зун?

 

Акьул:

— ШейтIандиз вун хьана юлдаш.

Залимарив хьана къардаш.

Эхирдай вун хьана яваш,

Пашман яз амукьдачни вун?

 

Шихмегьамед, вун гьавадиз,

Табий хьайтIа вун явадиз,

Са кар жеч, гьелбет, вавай дуьз,

Ви нефсинихъ шедачни вун?

 

Дустуниз

 

Дуьньяда дустунилай багьа шей авач,

Няметдиз за шукур ийиз ава, дуст.

Гъаиб тахьайтIани, рикIелай фидач,

Ачух ийида дустари зи гьава, дуст.

 

Чи дустар Аллагьди хуьрай гьамиша,

Веледарни эдебдалди вердиша,

Шукур ийиз, куьне нямет дадмиша,

Ахьтин девлет я дердинин дава, дуст.

 

Дуьньядин эхир авайд туш, фана я,

Адал шад хьун гъебет кар я, жана я,

Якъин чир хьухь: дуьнья карвансара я,

Алдатмиш хьай ксар жеда ява, дуст.

 

Нефсерни чин кьиникь патал гирав я,

Фагьумдач нефсин рикIер чIулав я,

Агъу я дуьньядин гьава, ялав я,

Чи бубаяр-дидеяр гьина ава, дуст.

 

ЧкIана ви фикир, хьана къаришмиш,

ТахьайтIани кIанзавай заз

гуьруьшмиш.

Алат хьанайтIа чи винелай и тешвиш,

Шад жедай чи дустарин гьава, дуст.

 

Лугьуз хьайитIа, чIалар мадни гзаф я,

Рахаз жедач, лугьуда вун халиф я.

Вучда рахана гьаваян, кьве гаф я,

Гьахьняй жезвач рахаз завай, дуст.

 

Яргъи идач, куьрелди за тамамда,

Акьул гуда ман затI течир авамда,

Эхи жедач хамаривай, заланда,

Кьарай кьадач чилера, я цава, дуст.

Абдулбари Магьмудован «ЦIийи Макьар» ктабдай.

«Лезги газетдин» 2025-йисан 43-нумрадай.